އައްޑޫގެ ގުޅިފައިވާ ރަށްތަކުގެ ނަރުދަމާގެ މަސައްކަތް ކުރިއަށް އޮތް ދޮޅު މަސް ދުވަހުގެ ތެރޭގައި ނިންމޭނެކަމަށް އެމްޓީސީސީން ބުނެފިއެވެ.
އެމްޓީސީސީން ބުނީ ފޭދޫ، މަރަދޫފޭދޫ، އަދި މަރަދޫގެ ނަރުދަމާގެ މަސައްކަތުގެ 90 އިން ސައްތަ މިހާރު ނިމިފައިވާ ކަމަށެވެ. އަދި ކުރިއަށް އޮތް ދޮޅު މަސްތެެރޭ ހުރިހާ މަސައްކަތެއް ނިމޭ ވަރުވާނެކަމަށް އެމްޓީސީސީން ބުނެއެވެ.
އޯޕެކް ފަންޑް ފޮރ އިންޓަރނޭޝަނަލް ޑިވަލޮޕްމަންޓް، އޯފިޑްގެ ލޯން އެހީގެ ދަށުން 130 މިލިއަނަށްވުރެ ގިނަ ރުފިޔާ ޚަރަދުކޮށްގެން ކުރިއަށް ގެންދާ މިމަޝްރޫއުގެ ދަށުން މިތިން ރަށުގެ 2500 އަށް ވުރެ ގިނަ ގެތަކަށް ނަރުދަމާ ހޮޅި ގުޅާލުމުގެ މަސައްކަތް މިހާރުވެސް ބާރު ސްޕީޑެއްގައި ދަނީ ކުރިއަށެވެ.
އެމްޓީސީސީން ބުނީ މި މަޝްރޫއުގެ ދަށުން މިތިން ރަށުގައި ޖުމްލަ 6 ޕަމްޕު ސްޓޭޝަން ގާއިމް ކުރެވޭއިރު މުޅި ނެޓްވޯކުގެ ދިގުމިން 38 ކިލޯ މީޓަރަށް އަރާނެކަމަށެވެ.
އައްޑޫގެ ނަރުދަމާގެ މަޝްރޫއު ކުރިއަށް ގެންދަނީ ޖުމްލަ ތިން ކުންފުންޏަކާއި ހަވާލުކޮށްގެންނެވެ. އެގޮތުން ހުޅުމީދޫގައި ނަރުދަމާގެ މަސައްކަތް ކުރީ ލަންކާގެ ސިއެރަ ކުންފުނިންނެވެ. އަދި ހިތަދޫގެ ނަރުދަމާގެ ނުނިމި ހުރި މަސައްކަތް ކުރަމުން އަންނަނީ އެމްޑަބްލިއުއެސްސީންނެވެ.
އައްޑޫގެ ނަރުދަމާގެ މަސައްކަތަކީ ރައީސް ނަޝީދުގެ ސަރުކާރުގައި 2009 ވަނަ އަހަރު ފެށި މަސައްކަތަކެވެ. ނަމަވެސް އެވެރިކަން ނިމުނު ފަހުން ހަތް އަހަރުވެގެންދާއިރު ވެސް އައްޑޫގެ ނަރުދަމާ ވިއުގައިގެ މަސައްކަތް ނިމި ރައްޔިތުންނަށް ހިދްމަތް ދެވޭވަރު ނުވެއެވެ.