ކްރައިސްޗާޗް (މާޗް 16)- ނިއު ޒީލެންޑުގެ ކްރައިސްޗާޗުގެ ދެ މިސްކިތަކަށް ހުކުރު ދުވަހުގެ ހުކުރު ވަގުތު ހަމަލާދީ މަރާލި 49 މީހުންގެ ޖަނާޒާގެ ކަންކަން ހަމަޖައްސައި އާއިލާތަކަށް އެހީތެރިވާނެކަމަށް ބޮޑުވަޒީރު ޖަސިންޑާ އާޑެން ވިދާޅުވެއްޖެއެވެ.
ބަޑީގެ ހަމަލާގައި މަރުވި ބައެއް އާއިލާތަކާއި ބައްދަލުކުރައްވައި ޖަސިންޑާ ވިދާޅުވީ އެމީހުންގެ ޖަނާޒާގެ ކަންކަން ފުރިހަމަކޮށް އާއިލާތަކަށް އެހީތެރިކަން ސަރުކާރުން ފޯރުކޮށްދޭނެކަމަށެވެ.
ޖަސިންޑާ ވިދާޅުވީ މަރުވެގެން ދިޔަ ފަރާތްތަކަކީ އާއިލާ ބެލެހެއްޓުމުގެ ޒިއްމާ އަދާކުރަމުން ދިޔަ ފަރާތްތައް ކަމަށާއި، އެމީހުން ނެތުމަކީ އާއިލާއަށް ފޫނުބެދޭ ވަރުގެ ގެއްލުމެއް ކަމަށެވެ.
ކްރައިސްޗާޗުގެ ދެ މިސްކިތަށް ދިން ހަަމަލާގައި މަރުވެފައިވާ މީހުންނަކީ އެގައުމަށް ހިޖްރަކޮށްފައިވާ މީހުންނެވެ. ޖަސިންޑާ ވިދާޅުވީ އެއާއިލާތަކަކީ ކޮންމެ ގައުމަކުން އައިސް ތިބި ބައެއް ނަމަވެސް އެ ފަރާތްތަކަށް ސަރުކާރުން އެހީތެރިކަން ފޯރުކޮށްދޭންކަމުގެ ޔަގީންކަން އަރުވާ ކަމަށެވެ.
ޖަސިންޑާ ވަނީ ހިޖާބުގައި އިއްޔެގެ ހާދިސާގައި މަރުވި ފަރާތްތަކުގެ އާއިލާތަކުގެ ގާތަށް ގޮސް ތައުޒިޔާ ރައްދުކޮށް ނިއުޒީލެންޑުގެ ހުރިހާ ރައްޔިތުންގެ ނަމުގައި އެއާއިލާތަކަށް ހިތްވަރު ދެއްވާފައެވެ. އަދި މުސްލިމު ކޮމިއުނިޓީއާއެކު ނިއުލީޒެންޑު ދެމި އޮންނާނެ ކަމަށްވެސް އޭނާ ވިދާޅުވިއެވެ.
ނިއުޒީލެންޑުގެ ކްރައިސްޗާޗުގެ ދެ މިސްކިތަކަށް އިއްޔެ ދިން މި ހަމަލާއަކީ މިފަހުގެ ތާރީހެއްގައި ހުޅަނގުގެ ގައުމެއްގައި މުސްލިމުންނަށް ދެވުނު އެންމެ ނުރައްކާތެރި އެއް ހަމަލާއެވެ. މި ހަމަލާ ދީފައިވަނީ އޮސްޓްރޭލިއާގެ ހައްދު ފަހަނަޅާފައިވާ ޓެރަރިސްޓެކެވެ.