ކްރައިސްޗާޗު 17 މާރިޗު- ނިއުޒީލެންޑުގެ ކްރައިސްޗާޗުގެ ދެމިސްކިތަކަށް ހުކުރު ދުވަހުގެ ހުކުރު ގަޑީގައި ދިން ޓެރަރިސްޓު ހަމަލާގައި މަރުވި 50 މީހުންގެ ތެރޭގައި އެގައުމުގެ ގައުމީ ފުޓްސަލް ޓީމުގެ ކީޕަރު އަތާ އަލައްޔާން ހިމެނޭކަމަށް ނިއުޒީލެންޑުގެ ފުޓްބޯޅަ އިދާރާއިން ބުނެފިއެވެ.
އަތާ މަރާލާފައިވަނީ މިސްކިތުގައި ނަމާދަށް ހުއްޓާއެވެ.
Rest in peace Atta. We can't understand the hate, but we do know the love of our futsal community and you won't be forgotten.
Futsal people, our people pic.twitter.com/xuLfZKzlhz— Futsalplanet.com (@futsalplanet97) March 16, 2019
ނިއުޒީލެންޑުގެ ފުޓްބޯޅަ އިދާރާއިން ބުނީ މަރާލި އަތާ އެގައުމުގެ ގައުމީ ފުޓްސަލް ޓީމަށް 19 މެޗު ކުޅެދީފައިވާ ކަމަށެވެ. އޭނާ އަކީ ގައުމީ ޓީމުގެ ގޯލް ބެލެހެއްޓި ކުޅުންތެރިއެކެވެ.
އަތާއަކީ ކުވައިތަށް އުފަން މީހެކެވެ. ނަމަވެސް ވަރަށް ކުޑައިރުއްސުރެން ފެށިގެން އަތާ ދިރިއުޅެފައިވަނީ ނިއުޒީލެންޑުގައެވެ.
އޮސްޓްރޭލިއާގެ ހައްދުފަހަނަޅާފައިވާ ޓެރަރިސްޓަކު ދިން ހަމަލާގައި ކުށެއް ނެތް 50 މުސްލިމުން ވަނީ ޝަހީދުކޮށްލާފައެވެ. މިއީ ނިއުޒީލެންޑުގެ ތާރީހުގައި ހިންގާފައިވާ އެންމެ ލާއިންސާނީ ހަމަލާކަމަށް މީޑިއާ ރިޕޯޓު ބުނެއެވެ.
ކްރައިސްޗާޗު ދެ މިސްކިތަށް ދިން ހަމަލާގައި ޝަހީދުވި މީހުންގެ ޖަނާޒާގެ ހަރަދު ސަރުކާރުން ކުރުމަށާއި ޝަހީދުވި މީހުންގެ އާއިލާތަކަށް ނިއުޒީލެންޑު ސަރުކާރުން އެހީވުމަށް ނިންމާފައިވާ ކަމަށް އެގައުމުގެ ބޮޑުވަޒީރު ޖަސިންޑާ އާޑެން ވަނީ ވިދާޅުވެފައެވެ.