މިހާރަކަށް އައިސް އިވެމުން ދަނީ ސ. ހިތަދޫ މެޖިސްޓްރޭޓް ކޯޓުން ދާދި ފަހުން އައްޑޫގެ އަވަށު ބޯޑްތަކަކަކީ ގާނޫނާ ހިލާފަށް އުފެެއްދި ބޯޑްތަކެއް ކަމަށް ކަނޑައެޅުމާ ގުޅިގެން ގިނަ ބަޔަކު އައްޑޫ ސިޓީ ކައުންސިލާ ކުރާ ސުވާލެވެ. "ތިޔަ ބޯޑްތައް އުވާލިލެެއް އަދިވެސް ލަހީ އެވެ. ހަގީގަތުގައި އެކަން ކުރަން ވެއްޖެތާ ކިތަންމެ ދުވަހެކެވެ."
އަވަށު ބޯޑްތައް އުފައްދައި އެ ބޯޑްތަކަށް ރައީސުންނާއި ނައިބު ރައީސުންގެ ގޮތުގައި ބަޔަކު ހަމަޖައްސާފައި ވަނީ "ދިވެހި ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު" އިން ސިޓީ ކައުންސިލަށް ދީފައި ނުވާ ބާރެއްގެ ބޭނުންކޮށްގެން އެ ގާނޫނާ ހިލާފަށް ކަމަށް ކުރި ހުކުމާއި ގުޅިގެން ކުރާ ސުވާލުތަކެކެވެ.
އައްޑޫ ސިޓީގެ ހިތަދޫ ނޫރުވާދީ އިބްރާހީމް ރަޝީދު ވަޖުދީ މިދިޔަ އަހަރުގެ ނޮވެމްބަރު 14 ގައި ކޯޓަށް ހުށަހެޅި މައްސަލަ އާ ގުޅިގެން ހިތަދޫ ކޯޓުން ކުރި ހުކުމްގައި ބުނެފައި ވަނީ އަވަށު ބޯޑުތައް އުފައްދާފައި ވަނީ ލާމަރުކަޒީ ގާނޫނުގެ 130 ވަނަ މާއްދާގެ (ހ) އާ ހިލާފަށް ކަމަށެވެ. ނަމަވެސް ސުވާލަކީ އެހުކުމަކީ އެންމެ ރަގަޅަށް ނިންމާފައިވާ ނިންމުމެއް ތޯ އެވެ.
މިކަމުގައި އެކި މީހުންގެ ހިޔާލު ތަފާތެވެ. ބައެއް މީހުން ދެކޭ ގޮތުގައި މިކަމަކީ ސިޔާސީ ބޭނުމަށް ކޮށްފައިވާ ކަމެއް ކަމަށާއި ވަކި ފިކުރަކަށް ތަބާވާތީ ކޮށްފައިވާ ކަމެއްގެ ގޮތުގައެވެ. އަދި ކައުންސިލަށް ކުރިއަށް ދެވޭނެ މަގުފަހިކޮށް ނުދީ އޮވެގެން ކައުންސިލް ގާނޫނާ ހިލާފްވާ ކަމަށް ބުނާ އިރު މުޅި ސަރުކާރު ވެސް އޮތީ ގާނޫނުން ބޭރުވެފައި ކަމަށެވެ.
ގިނަ މީހުން ދެކޭ ގޮތުގައި މިކަމަކީ ކޯޓުން ނިންމާފައިވާ ރަނގަޅު ކަމެއްގެ ގޮތުގައި ފާހަގަ ކުރެ އެވެ. ކޮންމެ ބަޔަކު ވެސް ޤާނޫނާއި ޤަވާއިދާ ހިލާފު ވެއްޖެ ނަމަ އެ ބަޔަކަށް ފިޔަވަޅު އަޅަން ޖެހޭނެ ކަަމަށާއި ކޯޓަކުން ކުރާ އަމުރުތަކަށް އެންމެން ވެސް ބޯ ލަނބަން ޖެހޭނެ ކަމަށެވެ.
އައްޑޫ ސިޓީ ކައުންސިލުން އަވަށު ބޯޑު ރައީސުންނާއި ނައިބު ރައީސުންގެ މަޤާމަށް މީހުން ހަމަޖައްސާފައިވުމުން ސަރުކާރަށް ވަރަށް ބޮޑެތި ގެއްލުންތަކާ ކުރިމަތި ވަމުންދާ ކަމަށް ސަރުކާރުން ދަނީ ތަކުރާރުކޮށް ބުނަމުންނެވެ.
އެހެން ކަމުން ހަގީގަތުގައި މި އަވަށު ބޯޑްތަކަކީ އެމްޑީޕީގެ އެކްްޓިވިސްޓުންތަކަކަށް ވަޒީފާ ދީ، ބޮޑެތި މުސާރަ ދޭން އުފެއްދި ބޯޑްތަކެއް ކަމަށް ގަބޫލް ކުރެވެ އެވެ.
އަވަށު ބޯޑްތަކެއް އުފައްދައިގެން ކުރަނީ ކޮން ކަމެއްތޯ އެވެ. އެ ބުނާ އަވަށު ބޯޑް ރައީސުންނާއި ނައިބު ރައީސުން އަދާ ކުރައްވާ ދައުރަކީ ކޮބައިތޯ އެވެ؟ އެ މީހުންގެ ކަމަކީ ކައުންސިލުން އުފައްދާފައި ހުރި ޑިޕާޓްމަންޓްތަކުން ނެރޭ އިއުލާންތަކުގައި ސޮއި ކުރުން ބާވަ އެެވެ؟
އެ ނޫން ކަމެއް އެ މީހުން ކޮށްފައި ހުރި ތަނެެއް މިހާތަނަކަށް ފެންނާކަށް ނެތެވެ. އެއީ ކީއްކުރަން ކޮން ބޭނުމެއްގައި ލައިގެން އުޅޭ ބައެއްކަން ރައްޔިތުންނަށް ސާފުކޮށް އެެނގެ އެވެ.
މަސައްކަތެއް ނުކޮށް ޑިޕާޓްމަންޓްތަކުގައި ކެބިން ހަދައިގެން އޭސީ އާއި އިންޓަނެޓް ލައިގެން އެ ބުނާ ރައީސުންނާއި ނައިބް ރައީސުން ކުރައްވާ މަސައްކަތެއް އައްޑޫ ސިޓީ ކައުންސިލުން ރައްޔިތުންނަށް ނިކަން ދައްކަ ބަލާށެވެ.
މިއީ ހަމަ ހުސް ސިޔާސީ ކުޅިވަރެވެ. މުޅި އައްޑޫ ސިޓީ ކައުންސިލްް ކޮންޓްރޯލް އޮތީ އެމްޑީޕީީގެ އަތްމަތީގައި ކަމުން ބޭނުންހާ ގޮތެެއް ހަދަން ދިމާ ކުރަނީ އެވެ.
ކައުންސިލުން އެއްކޮޅުން ދައްކަނީ އައްޑޫގެ ތަރައްގީގެ ކަންކަން ކުރަން ބަޖެޓް ނެތް ވާހަކަ އެވެ. ސަރުކާރުން އައްޑޫގެ ތަރައްގީގެ މަަޝްރޫއުތައް ހިންގަން ފައިސާ ނުދީ، މަޝްރޫއުތައް ހުއްޓުވާ ވާހަކަ އެވެ. އަނެއްކޮޅުން ބޭކާރު މަގާމުތަކެއް ހަދައިގެން ކައުންސިލުން ފައިސާ ބޭކާރު ކުރަނީ އެވެ.
"ޒިންމާއެއް، މަސްއޫލިއްޔަތެއް ނެތް" އަވަށު ބޯޑް ރައީސުންނާއި ނައިބް ރައީސުންގެ ގޮތުގައި ބަޔަކު އައްޔަންކޮށްގެން ލާރި ތަޅަނީ އެވެ. ބޭކާރު ކުރަނީ އެވެ.
ކޯޓުގެ ނިންމުމަށް ދެން ވެސް އިހުތިރާމް ކުރާ ނަމަ، ތިޔަ ރައީސުންނާއި ނައިބް ރައީސުންގެ މަގާމުތަކަކީ ބާތިލް މަގާމުތަކެއް ކަމަށް ގަބޫލްކޮށް ތި ވެރިން ގެއަށް ފޮނުވާލާށެެވެ. އެހެން ނޫނީ ރައްޔިތުން ތި ވެރިން ނެރެން ނިކުމެ ދާނެ އެވެ. އެެކަން އެގޮތަށް ކުރަން ވެެއްޖެ ނަމަ މާ ތާހިރެެއް ނުވާނެ އެވެ.
އޭރުން ގައިމު ވެސް ރައްޔިތުންގެ ހައްގުގައި ކޮންމެވެސް ކަމެެއް ކުރާނެ ލާރިކޮޅެއް ސަލާމަތް ކުރެވިފައި އޮންނާނެ އެެވެ.
އެހެންކަމުން އެ މައްސަލައިގައި ކައުންސިލަރުންގެ މައްޗަށް ދައުވާ ކުރަން ޕީޖީ އަށް ފޮނުވަން ނިންމާފައިވާ ކަމަށް ވެސް އޭސީސީން ކުރިން ބުނެފައި ވެ އެވެ.
އަވަށު ބޯޑްތަކަށް ރައީސުންނާއި ނައިބު ރައީސުން އައްޔަން ކުރި މައްސަލަ ތަހުގީގުކޮށް އެންޓި ކޮރަޕްޝަން ކޮމިޝަން (އޭސީސީ) އިން އައްޑޫ މޭޔަރު އަބްދުﷲ ސޯދިގް (ސޯބެ) އަށް ފޮނުވި ރިޕޯޓްގައި ބުނެފައި ވަނީ ކައުންސިލަރުންގެ އެ އަމަލުގެ ސަބަބުން ދައުލަތަށް 2،197،714.01ރ. މިލިއަން ގެއްލުން ވެފައިވާ ކަމަށާއި އެ ގެއްލުމުގެ ބަދަލު ހޯދަން ދައުވާ ކުރައްވާނެ ކަމަށެވެ.
އެންމެ ފަހުން ރައީސް ޑރ. މުހައްމަދު ވަހީދު ހަސަން މަނިކު ވެސް އައްޑޫ ސިޓީ ކައުންސިލަށާއި މާލެ ސިޓީ ކައުންސިލަށް ވަރަށް ބޮޑަށް ފާޑު ވިދާޅުވެފައިވެ އެވެ.
އެގޮތުން ދިވެހި ދައުލަތަކީ ޔުނިޓަރީ ދައުލަތެއް ކަމަށް ގާނޫނު އަސާސީގައި ބުނެފައިވީ ނަމަވެސް މާލެ އާއި އައްޑޫގައި ވެރިކަން ހިންގަނީ ފެޑެރަލް ސަރުކާރެއްގައި ކަންކަން ހިނގާ އުސޫލުން ކަމަށް ރައީސް ވަނީ ސިފަ ކުރައްވާފަ އެވެ.
އެހެން ގޮތަކަށް ބުނާ ނަމަ އައްޑޫ ސިޓީ ކައުންސިލުން "ސަރުކާރު ގަބޫލް ނުކުރާ ނުކޮށް، ހިންގަން މި އުޅެނީ ވަކި ސަރުކާރެކެ" ވެ. އެހެންވެ މީގެ ހުރިހާ ގެއްލުމަކާއި ތުރާލެއް ތަހައްމަލް ކުރަން ޖެހިފައި ވަނީ އައްޑޫގެ ރައްޔިތުންނަށެވެ.