ނިއުޒީލެންޑުގެ ކްރައިސްޗާޗުގެ ދެ މިސްކިތަކަށް މިދިޔަ ހުކުރު ދުވަހުގެ ހުކުރު ގަޑީގައި ދިން ބަޑީގެ ހަމަލާގައި 50 މުސްލިމުން ޝަހީދުވި ހާދިސާއަށް ފަހު ގިނަ ބަޔަކު އިސްލާމް ދީން ގަބޫލް ކުރަމުން އަންނަ ކަމަށް ބައެއް މީޑިއާ ރިޕޯޓުތަކުން ބުނެފިއެވެ.
އޮސްޓްރޭލިއާގެ ހަރުކަށި ފިކުރުގެ ޓެރަރިސްޓަކު ބަޑިން ހަމަލާދީފައިވަނީ ގިނަ ބަޔަކު ހުކުރު ނަމާދަށް ހާޒިރު ވަމުން ދަނިކޮށެވެ. ބަޑި ހިފައިގެން ވަދެ މިސްކިތުގެ ތެރޭގައި ނަމާދު ކުރުމަށާއި ގުރުއާން ކިޔަވަން ތިބި އެތައް ބަޔަކުވަނީ ޝަހީދު ކޮށްލާފައެވެ. މި ހަމަލާގައި 50 އަށް ވުރެ ގިނަ މީހުން މަރުވެ 80 އަށް ވުރެ ގިނަ މީހުން ޒަހަމްވެފައިވާ އިރު މިއީ މިހާތަނަށް އެގައުމުގައި ހިންގި އެންމެ ބޮޑު ލޭ އޮހުރުމެވެ.
އޮސްޓްރޭލިއާ އަދި ނިއުޒީލެންޑުގައި އިސްލާމް ދީން ކުރިއެރުވުމަށް މުސްލިމުން ހިންގާ ބައެއް ހަބަރު ފަތުރާ ވަސީލަތްތަކުން ހާމަ ކުރާ ގޮތުގައި ހުކުރު ދުވަހުގެ ހަމަލާއަށް ފަހު 350 އަށް ވުރެ ގިނަ މީހުން އިސްލާމްދީން ގަބޫލް ކޮށްފައިވާކަމަށެވެ.
މި ހަމަލާގައި ޝަހީދުވި މީހުންގެ ޖަނާޒާގައި އެތައް ހާސް ބަޔަކު ވަނީ ބައިވެރިވެފައެވެ.
ކްރައިސްޗާޗު މިސްކިތަށް ދިން ހަމަލާގައި ޝަހީދުވި އާއިލާ ތަކާއި ނިއުޒީލެންޑުގެ ބޮޑުވަޒީރު ޖަސިންޑަރ އާޑެން ބައްދަލު ކުރައްވާފައިވަނީ ހިޖާބު އަޅައިގެންނެވެ. މި ހިތާމަވެރި ދަނޑިވަޅު އެއާއިލާތަކާއި ބައްދަލު ކުރުމަށް ހިޖާބުގައި ޖަސިންޑަރ ވަޑައިގަތުމުން ގިނަ ބައެއްގެ ތައުރީފް ވަނީ އެކަމަނާއަށް ލިބިފައެވެ. އަދި ޝަހީދުވި މީހުންގެ ޖަނާޒާގެ ކަން ކަން ކުރުމަށާއި އާއިލާތަކަށް އެހީތެރިވެދިނުމަށް ބޮޑުވަޒީރު ވަނީ ނިންމާފައެވެ.
މިހާދިސާ އާއި ގުޅިގެން ނިއުޒީލެންޑުގެ ސަލާމަތީ ކަންކަން ވަނީ ވަރަށް ވަރުގަދަކޮށްފައެވެ. އަދި ގިނަ ބަޔަކު އަދިވެސް ތިބީ ޝޮކެއްގައެވެ. މި ހާދިސާގައި ގިނައިން ޝަހީދުވެފައިވަނީ އެގައުމަށް ހިޖްރަކޮށްފައިވާ މީހުންނެވެ. އޭގެ ތެރޭގައި އަފްއާނިސްތާނު ކުވައިތު އަދި ސައުދީ ފަދަ ގައުމުތައް ހިމެނެއެވެ.
މި ހަމަލާ ދުނިޔޭގެ ގިނަ ގައުމު ތަކާއި މުސްލިމު ޖަމާއަތްތަކުން ވަނީ ކުށްވެރިކޮށްފައެވެ.