މަސައްކަތްތެރިން ބާރުވެރިކުރަން މަހުޖަނުން އެއްވެސް އިރެއްގައި ނޭދޭނެ ކަމަށް ޓޫރިޒަމް އެމްޕްލޯޔީ އެސޯސިއޭޝަން އޮފް މޯލްޑިވްސް (ޓީމް) އިން ބުނެފިއެވެ.
ޓީމް އިން މިހެން ބުނެފައިވަނީ މަޖިލިސް އިންތިޚާބުގެ ބަހުސްގައި އޭދަފުށި ދާއިރާއަށް ވާދަކުރާ މަޝްހޫރު ރެޑްވޭވް ކުންފުނީގެ ވެރިޔާ، އަހުމަދު ސަލީމް ދެއްކެވި ވާހަކަތަކާ ގުޅިގެންނެވެ. ސަލީމް ވަނީ ބަހުސްގައި ރިސޯޓުތަކުގައި މަސައްކަތް ކުރާ ރޫމްބޯއިން ފެންވަރުގެ މީހުންނަކީ އެއްވެސް ބައެއް ނޫން ކަމަށް ދޭހަވާ ގޮތަށް ވާހަކަ ދައްކާފައެވެ.
ޓީމް އިން ބުނެފައިވަނީ ނަޒާހަތްތެރިކަން ގެއްލިފައިވާ، އަމިއްލަ އެދުމުގެ މަހުޖަނުން މަސައްކަތްތެރިން ބާރުވެރިވާން ނޭދޭނެ ކަމަށެވެ.
ސަލީމް ވަނީ މީގެ ކުރިންވެސް އޭނާއަކީ މާލީ ބަޔާން ހާމަކުރަން ޖެހޭ މީހެއް ނޫން ކަމަށާއި މާލޭގެ އަވަށްތަކަށް ބަލާލުމުން މާލީ ބަޔާން ހާމަވެގެންދާނެ ކަމަށް ބުނެފައެވެ.