ހުޅުމާލެ ހައިވޭގައި ދުއްވާފައި ދިޔަ ކާރަކުން ޖެހި ހައިވޭގެ ޑިވައިޑާ ތަކެއް އަނެއްކާވެސް ފުނޑުފުނޑު ވެއްޖެއެވެ.
މިއަދު 11:34 ހާއިރު މި ހާދިސާ ހިނގާފައިވަނީ މާލެއިން ހުޅުމާލެއަށް ދިޔަ ޓެކްސީ އެއް ހައިވޭ 4 ލޭން ނިމޭ ހިސާބުގައި ހުރި ޑިވައިޑާތަކުގައި ޖެހިގެންނެވެ.
މި އެކްސިޑެންޓްގައި މީހަކަށް އަނިޔާ އެއް ވެފައި ނުވާ އިރު ކާރުގައި އެވަގުތު އިނީ ޓެކްސީ ޑްރަވަރ އެކަނި ކަމަށާއި އޭނާ އަކީ ޓެކްސީ ކުރުމުގެ ހުއްދަ އޮންނަ ފަރާތެއް ކަމަށް ފުލުހުން ބުނެއެވެ.
ފަހަކަށް އައިސް ހައިވޭގައި ގިނަ އެކްސިޑެންޓު ތަކެއް ހިނގައި މީހުންނަށް ބޮޑެތި ހާނިކަ ވަމުން އަންނަ އިރު އެކްސިޑެންޓު ތައް މަދުކުރުމަށް ފުލުހުން އަންނަނީ މާލެ އަދި ހުޅުމާލޭގެ އެކި ސަރަހައްދުތަކުގައި ޗެކްޕޯސްޓް ޖަހައިގެން ވެހިކަލްތައް ފާސްކުރަމުންނެވެ.