ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން ހިންގި އޮޕަރޭޝަނެއްގައި، މާލޭގެ ގެއެއް ބަލައިފާސްކޮށް ގިނަ އަދަދެއްގެ ބަނގުރަލާއެކު އަށް ބިދޭސީއަކު ހައްޔަރުކޮށްފިއެވެ.
ފުލުހުން ބުނީ މައްޗަންގޯޅި ގެއެއްގައި ބަނގުރާ އުފައްދާ ފުޅާދާއިރާއެއްގައިި ބަނގުރަލުގެ ވިޔަފާރިކޮށް ބަނގުރާ ގެންގުޅެ އަދި ބަނގުރާ ބޭނުންކުރާކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާއި ގުޅިގެން ހިންގި މި އޮޕަރޭޝަނުގައި ހައްޔަރުކޮށްފައިވަނީ 21 އަހަރުގެ މީހަކާއި، 22 އަހަރުގެ މީހަކާއި، 24 އަހަރުގެ މީހެއްގެ އިތުރުން 25 އަހަރުގެ މީހަކާއި، 26 އަހަރުގެ މީހަކާއި އަދި 27 އަހަރުގެ މީހަކާއި، 29 އަހަރުގެ މީހެއްގެ އިތުރުން 33 އަހަރުގެ މީހެއް ކަމަށާއި، މި އަށް މީހުންނަކީވެސް ބަނގުލަދޭޝްގެ ރައްޔިތުން ކަމަށެވެ.
ޑްރަގް އެންފޯސްމަންޓް ޑިޕާޓްމަންޓާއި އިންޓެލިޖެންސް ގުޅިގެން އިއްޔެ ހިންގި މިއޮޕަރޭޝަންގައި، އެ ގެ ބަލައިފާސްކުރިއިރު ބަނގުރާކަމަށް ޝައްކުކުރެވޭ ދިޔާ އެއްޗެއް ހުރި 500 މިލިލީޓަރުގެ 888 ޕްލާސްޓިކް ފުޅިއާއި، ބަނގުރާކަމަށް ޝައްކުކުރެވޭ ދިޔާ އެއްޗެއް ހުރި ފަސް ލީޓަރުގެ ޕްލާސްޓިކް ހަ ފުޅިއާއި، ބަނގުރާކަމަށް ޝައްކުކުރެވޭ ދިޔާ އެއްޗެއް ހުރި 14 ޓައްޕު ފެނިފައިވާ ކަމަށްވެސް ފުލުހުން ބުނެއެވެ.
މި މައްސަލައިގައި ހައްޔަރުކުރި 08 މީހުންގެ ބަންދަށް 15 ދުވަސް ޖަހާފައިވާއިރު، ޑްރަގް އެންފޯސްމަންޓް ޑިޕާޓްމަންޓުން ގެންދަނީ މި މައްސަލަ ތަޙުޤީޤު ކުރަމުން ކަމަށް ފުލުހުން ބުނެއެވެ.