ރާއްޖޭގެ 11 ރަށެއްގައި ފެނާއި ނަރުދަމާގެ ޚިދުމަތް ޤާއިމްކޮށްދޭނެ ފަރާތެއް ހޯދަން އިއުލާންކޮށްފި އެވެ.
ފިނޭންސް މިނިސްޓްރީ އިން މިއަދު ކުރި އިއުލާނެއްގައި ބުނެފައި ވަނީ ފެނާއި ނަރުދަމާ ޤާއިމްކުރަން ބޭނުންވަނީ ހއ.ފިއްލަދޫ އާއި ހދ. ފިނޭ އާއި ހދ. ނައިވާދޫ އާއި ށ. ނަރުދޫ އާއި ށ.މާއުނގޫދޫ އާއި ނ. ޅޮހި އާއި ނ. ހޮޅުދޫ އާއި ރ. އިނގުރައިދޫގެ އިތުރުން ފ. މަގޫދޫ އާއި ލ. މާވަށް އަދި ކ. ގުޅީގައި ކަމަށެވެ.
މި މަސައްކަތަށް ޝަރުތުހަމަވާ ފަރާތެއް ހޯދާނީ އިންޓަރނޭޝަނަލް ކޮމްޕެޓިޓިވް ބިޑިންގ (އައި.ސީ.ބީ) އުސޫލުގެ މަތިން ކަމަށާއި، މަސައްކަތަށް ކުރިމަތިލާ ފަރާތްތަކުގައި ހުންނަންޖެހޭ ޝަރުޠުތަކާއި އިވެލުއޭޓްކުރެވޭ ކްރައިޓީރިއާ ބީލަން ފޮތުގައި ބަޔާންކުރެވިފައިވާނެ ކަމަށް އެ އިއުލާންގައި ބުނެފައި ވެއެވެ.
ބިޑް ސެކިއުރިޓީ ދިވެހި ރުފިޔާއިން ނުވަތަ އެ އަދަދާ އެއްވަރެއްގެ އަދަދެއް އެމެރިކާ ޑޮލަރުންވެސް ހުށަހެޅޭނެ ކަމަށާއި، ބިޑް ސެކިއުރިޓީގެ މުއްދަތަކީ ބިޑް ހުޅުވާ ތާރީޚުން ފެށިގެން 148 ދުވަސް ކަމުގައިވެސް އެ އިއުލާންގައި ބުނެފައި ވެއެވެ.
މި މަޝްރޫޢުތަކަށް ބީލަން ހުޅުވުން އޮންނާނީ އަންނަ އޭޕްރީލް މަހުގެ 18 ވާ ބުރާސްފަތި ދުވަހުގެ 10:00 ގައި ފިނޭންސް މިނިސްޓްރީގައެވެ. އަދި ބީލަމުގައި ބައިވެރިވުމަށް 1,500/- (ފަނަރަ ސަތޭކަ) ދިވެހި ރުފިޔާ ނުވަތަ 100 އެމެރިކާ ޑޮލަރުގެ ނަން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހޭނެ ކަމަށާއި، ފައިސާ ބަލައިގަންނާނީ މި ހިނގާ މާޗު މަހުގެ 21 އިން އަންނަ އޭޕްރީލް މަހުގެ 17 އަށް، ބަންދު ނޫން ކޮންމެ ދުވަހެއްގެ 08:30 އިން 12:00 އަށް އެ މިނިސްޓްރީއިން ކަމަށްވެސް އިއުލާންގައި ބުނެފައި ވެއެވެ.