ދެކުނު އެފްރިކާގެ ޤައުމްތަކަކަށް އެރި ނަގޫރޯޅިއެއްގައި 215 މީހުން މަރުވެއްޖެ އެވެ.
މޮޒަމްބީގްގެ ރައީސް ފިލީޕޭ ނިއޫސީ ވިދާޅުވާ ގޮތުގައި އީޑާއިގެ ނަމުން ނަން ދީފައިވާ މި ނަގޫރޯޅީގައި މަރުވި މީހުންގެ އަދަދު 1،000 އަށްވުރެ މަތިވުމަކީ އެކަށީގެންވާ ކަމެއް ކަމަށެވެ.
މީޑިއާ އަށް ދެއްވި އިންޓަވިއުއެއްގައި ރައީސް ފިލީޕޭ ވިދާޅުވީ 84 މީހުންގެ މަރު ކަށަވަރުކުރެވިފައިވާއިރު، މި ހާދިސާގެ އަސަރުތައް ވަރަށް ބޮޑު ކަމަށާއި، އަސަރުކުރި ސަރަޙައްދުތައް މަތިން ދަތުރުކުރެއްވިއިރު، ކޯރުތަކުގައި މަރުވެފައިވާ މީހުންގެ ހަށިގަނޑުތައް އޮޔާދާ މަންޒަރު ފެނިވަޑައިގެންނެވި ކަމަށެވެ.
މިދިޔަ ހަފްތާގައި މޮޒަމްބީގަށް އެރި މި ނަގޯރޯޅި ވަނީ މިހާރު ޒިމްބާބްވޭ އާއި މަލާވީ އަށްވެސް ފެތުރިފައެވެ.
ރެޑް ކްރޮސް އާއި ހަވާލާދީ "އަލްޖަޒީރާ" އިން ރިޕޯޓްކުރާ ގޮތުގައި މޮޒަމްބީގް އާއި މަލާވީގައި މަދުވެގެން 126 މީހުން މަރުވެފައިވާއިރު، ޒިމްބާބްވޭގެ އިންފޮމޭޝަން މިނިސްޓްރީ އިން މަޢުލޫމާތު ދޭ ގޮތުގައި އެ ޤައުމުގައި 89 މީހުން ވަނީ މަރުވެފައެވެ.
މޮޒަމްބީގްގައި ގިނަ މީހުން މަރުވެފައި ވަނީ ބެއިރާ ސިޓީގައެވެ. އެ ސިޓީގެ 90% ހަލާކުވެފައިވާ ކަމަށް އިންޓަނޭޝަނަލް ފެޑަރޭޝަން އޮފް ރެޑް ކްރޮސް އެންޑް ރެޑް ކްރެސެންޓް ސޮސައިޓީސް (އައިއެފްއާރްސީ) އިން ބުނެއެވެ.
އައިއެފްއާރްސީ އިން ނެރުނު ބަޔާނެއްގައި ބުނެފައި ވަނީ ފެން ރައްކާކުރާ ތާންގީއެއް ފަޅައިގެން ގޮސް، 530،000 މީހުންގެ އާބާދީއެއް އޮންނަ އެ ސިޓީއަށް ދާން އޮންނަ އެންމެ ފަހު މަގުވެސް އިއްޔެ ބަންދުވެފައިވާ ކަމަށެވެ.
މި ހާދިސާގެ އަސަރުކޮށްފައިވާ މިންވަރު އެނގުމާއެކު، މަރުވި މީހުންގެ އަދަދު އިތުރުވާނެ ކަމަށް ލަފާކުރެވޭ ކަމަށާއި، ކުރިއަށް އޮތް ދުވަސްތަކުގައި ވެސް ބޯކޮށް ވާރޭވެހޭނެ ކަމަށް ލަފާކުރެވޭ ކަމަށް އައިއެފްއާރްސީ އިން ބުނެއެވެ.
މި ހާދިސާ އާއި ގުޅިގެން އެތައް ސަތޭކަ މީހުންނެއް ވީނުވީއެއް ނޭނގި ގެއްލިފައިވާއިރު، 1.5 މިލިއަނަށްވުރެ ގިނަ މީހުންނަށް ވަނީ މި ހާދިސާގެ އަސަރުކޮށްފަ އެވެ.