ކީރިތި ޤުރުއާނުގެ އާޔަތްތައް ނުބައިކޮށް ލިޔެ، ރާއްޖޭގައި ފޮތެއް ޝާއިއުކޮށްފިއެވެ. އިސްލާމިކް މިނިސްޓްރީން ބުނީ 'ކީރިތި ޤުރުއާން ކިޔެވުމަށް އެހީއެއް – ދަރިވަރުންނަށް ޚާއްސަ 5' ފޮތް ޝާއިއުކޮށްފައިވަނީ މިނިސްޓްރީން ނަގަން ޖެހޭ ހުއްދަ ނެގުމަށްފަހު ނޫން ކަމަށެވެ.
މިފޮތުގައި ކުށް ހުރިކަން އާންމުންގެ ސަމާލުކަމަށް ގެނެސްފައިވަނީ ޑރ. އިޔާޒް ޓުވީޓާގައި ކުރެއްވި ޓުވީޓަކުންނެވެ. އިޔާޒް ވަނީ ބައެއް އާޔަތްތައް މިފޮތުގައި ހުރީ ނުބައިކޮށް ކަމަށާއި، ބޭނުންކުރައްވާ ފަރާތްތަކުން ސަމާލުކަން ދިނުމަށް އިލްތިމާސް ކުރާ ކަމަށް ބުނެ އާންމުންގެ ސަމާލުކަމަށް ގެނެސްފައެވެ.
ފޮތާ ގުޅޭގޮތުން އިސްލާމިކް މިނިސްޓްރީގެ ބަހެއް އަދި ލިބިއެއް ނުވެއެވެ. ނަމަވެސް މިނިސްޓްރީއާ ހަވާލާދީ "ސީއެންއެމް" އިން ރިޕޯޓުކޮށްފައިވާ ގޮތުގައި ފޮތް ލިޔެ ޝާއިއުކުރީ ހުއްދަ ނުނަގާ ކަމަށެވެ.
ކިޔަވާ ކުދިންނަށް ޚާއްސަ މިފޮތުގައި ޤުރުއާން ނުބައިކޮށް ލިޔެވިފައި ހުރުމުން އެ މައްސަލަ މިހާރު އެޑިއުކޭޝަން މިނިސްޓްރީން ވެސް ވަނީ ބަލަން ފަށާފައެވެ.