ރައީސް އިބްރާހިމް މުހައްމަދު ސޯލިހަށް ވެރިކަން ލިބުމުން އެމްޑީޕީން "އެއްލާލި" ބަދުނަސީބު މީހުންގެ ތެރޭގައި އޭނާވެސް ހިމެނޭ ކަމަށް ކުރީގެ އިލެކްޝަންސް ކޮމިޝަންގެ ރައީސް އަދި އެމްޑީޕީ ލަންކާ ޓީމާއެކު ގިނަ މަސައްކަތެއް ކުރެއްވި ފުވާދު ތައުފީގް ވިދާޅުވެއްޖެއެވެ.
ރައްޔިތުންގެ މަޖިލީހުގެ މައްޗަނގޮޅި ދެކުނު ދާއިރާއަށް އަމިއްލަ ގޮތުން ވާދަކުރާ ފުވާދު، އެމްޑީޕީއަށް ގެއްލުނީ ކިހިނެއްތޯ ކުރީގެ ފޮރިން މިނިސްޓަރ، އަހުމަދު ޝަހީދު ކުރެއްވި ސުވާލަކަށް ޖަވާބު ދެއްވަމުން ފުވާދު ވިދާޅުވީ ކެޔޮގަނޑު ކަނޑާލުމުން އެއްލާލި މީހުންގެ ތެރޭގައި އޭނާވެސް ހިމެނޭ ކަމަށެވެ.
ރިޔާސީ އިންތިޚާބުގެ ކުރިން އެމްޑީޕީގެ ޓީމުތަކާއެކު ގިނަ މަސައްކަތްތަކެއް ކުރެއްވި ކަމަށާއި ނަމަވެސް އިންތިޚާބަށް ފަހު އޭނާގެ ބޭނުން އެޕާޓީއަށް ކެނޑިފައިވާ ކަމަށް ފުވާދު ބުނެފައިވެއެވެ.
މަޖިލިސް އިންތިޚާބަށް އެމްޑީޕީން ޕްރައިމަރީ ބޭއްވި އިރު ފުވާދު ވިދާޅުވީ އޭނާއަކީ އެމްޑީޕީއާއެކު ކުރިއަށްދާން ބޭނުން މީހެއް ނޫން ކަމަށާއި، ނިކުންނާނީ މިނިވަން ކެންޑިޑޭޓެއްގެ ގޮތުގައި ކަމަށެވެ. އެހެންކަމުން އެމްޑީޕީ ޕްރައިމަރީގައި ވެސް ބައިވެރިވެފައެއް ނުވެއެވެ.
ޖުމުހޫރީ ޕާޓީގެ ލީޑަރ ގާސިމް އިބްރާހިމް ވެސް ވަނީ ވެރިކަން ލިބުމުން ޖުމުހޫރީ ޕާޓީއާއި އެމަނިކުފާނު އަނެއްކާވެސް، އެމްޑީޕީން އެއްލާލައި މަގުމަތިކޮށްލާފައިވާ ކަމަށް ތުހުމަތުކުރައްވާފައެވެ.