ބައިނަލްއަޤުވާމީ ފޮރެސްޓް ޑޭ، ނުވަތަ ޖަންގަލީގެ ދުވަހާއި ބައިނަލްއަޤުވާމީ ގަސް އިންދުމުގެ ދުވަސް ފާހަގަ ކުރުމުގެ ގޮތުން އައްޑޫ ނޭޗަރ ޕާކުން އައްޑޫގައި ޓްރެޝަރ ހަންޓެއްް ބޭއްވުމަށްވަނީ ހަމަޖައްސާފައެވެ.
އާއިލާތަކާއި އެކުވެރިން އެކުގައި މަޖާ ވަގުތުކޮޅެއް ހޭދަކޮށްލެވޭނެހެން ރާވާފައިވާ މި މުބާރާތް ކުރިއަށް ގެންދިޔުމަށް ހަމަޖެހިފައިވަނީ އައްޑޫ ނޭޗަރ ޕާކު ސަރަހައްދުގައި، 21 މާރޗު ވާ ބުރާސްފަތި ދުވަހުގެ ހަވީރު 16:00 އިން 18:00 އަށެވެ.
12 އަހަރުން މަތީގެ ކޮންމެ މީހަކަށްވެސް ބައިވެރިވެވޭ ގޮތަށް ރާވާފައިވާ މި މުބާރާތުގައި އެއްވަނައަށް ދާ ޓީމަކަށް ދޭން ހަމަޖެހިފައިވާ އިނާމަކީ ޓީމުގެ ހުރިހާ މެމްބަރުންނަށް ފާސްޓް ފުޑްއިން 3 ކޯސްގެ ރޭގަނޑު ކެއުމެވެ. މުބާރާތުގައި ބައިވެރިވުމަށް ހުޅުވާލާފައިވަނީ 5 ބައިވެރިންގެ 8 ޓީމަށެވެ.
އައްޑޫ ނޭޗަރ ޕާކުން މައުލޫމާތު ލިބިފައިވާ ގޮތުގައި މި ހަރަކާތް ހިންގުމުގެ މަޤްޞަދަކީ ގަސް އިންދުމާއި ޖަންގަލިތަކަށް މީހުންގެ ހިތްތަކުގެ ލޯބި ޖެއްސުމުގެ އިތުރުން ތިމާވެއްޓާއި އޮންނަ ގުޅުން ބަދަހިކުރުވުމެވެ. މިގޮތުން މިހަރަކާތުގެ ތެރޭގައި ގަސްގަހާއި ޖަންގަލިތަކާ ބެހޭ މައުލޫމާތު ލިބިގެން ދިޔުމުގެ އިތުރަށް ގަސް އިންދުމުގެ ބައެއްވެސް ހިމެނޭނެ ކަމަށް އައްޑޫ ނޭޗްރ ޕާކުން މައުލޫމާތުދެއެވެ.
ޓްރެޜަރ ހަންޓުގައި ބައިވެރިވުމަށް ޝައުގުވެރިވާ ޓީމުތަކުން ނަން ނޯޓުކުރުމަށް ގުޅަންޖެހޭ ނަންބަރަކީ 7580059 އެވެ. މުބާރާތުގައި ބައިވެރިވެވޭނީ އެންމެ ފުރަތަމަ ނަން ނޯޓު ކުރާ 8 ޓީމަށެވެ.