ޤާނޫނާއި ޚިލާފަށް އާންމުންގެ ޒާތީ މަޢުލޫމާތު ހިއްސާކުރާ ކަމަށް ތުހުމަތުކުރެވޭ "ހަކުޅި" އެޕްލިކޭޝަންގެ މައްސަލަ ޕަބްލިކް އިންޓްރެސް ލޯ ސެންޓަރ (ޕީއައިއެލްސީ) އިން ސިވިލް ކޯޓަށް ހުށަހަޅައިފި އެވެ.
ޕީއައިއެލްސީ އިން ނެރުނު ބަޔާނެއްގައި ބުނެފައި ވަނީ އެ އެޕްލިކޭޝަން އާއި ގުޅޭ ޝަކުވާތައް ވަރަށް ގިނަ ފަރާތްތަކުން އެ ޖަމިއްޔާ އަށް ހުށަހަޅާފައިވާ ކަމަށާއި، ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާ ކެންޑިޑޭޓުންނަށް އެ އެޕްލިކޭޝަން ވިއްކާފައިވާ ކަމަށެވެ. އެ އެޕްގައި ހިމަނާފައިވާ މަޢުލޫމާތުގެ ތެރޭގައި އާންމުންގެ ނަމާއި، އެޑްރެސް އަދި ފޮޓޯ އާއި ބައެއް ފަރާތްތަކުން ޒާތީ މަޢުލޫމާތުވެސް ހިމެނެއެވެ.
އެ އެޕްލިކޭޝަންގެ މައްސަލަ ކޯޓަށް ހުށަހަޅާފައި ވަނީ އާންމުންގެ މައުލޫމާތު ހުއްދައާ ނުލައި ވިއްކުމަކީ ޤާނޫނު އަސާސީގެ 24 ވަނަ މާއްދާ އާއި އައިސީސީޕީއާރްގެ 17 ވަނަ މާއްދާއާ ޚިލާފުކަމެއް ކަމަށް ބުނެ އެވެ.
ޕީއައިއެލްސީ އިން ބުނީ މި އެޕްލިކޭޝަން އާއި ގުޅުންހުރި ފަރާތްތައް ކަމުގައިވާ އަބްދުﷲ ޝުހޫދު އާއި އަބްދުﷲ އަބްދުއްރަހީމް އާއި ދެކޮޅަށް ސިވިލް ކޯޓްގައި މައްސަލައެއް ހުށަހަޅާފައިވާ ކަމަށެވެ. އަދި އަމިއްލަ، ޒާތީ މަޢުލޫމާތު ހުއްދަނެތި ބޭނުންކުރުމާއި ވިއްކުމަކީ ޣައިރު ޤާނޫނީ ޢަމަލެއްގެ ގޮތުގައި ކަނޑައަޅައި ދިނުމަށާއި، އެފަދަ މަޢުލޫމާތު، ދައުވާ ލިބޭ ފަރާތްތަކަށް، ޤާނޫނާއި ޚިލާފަށް ބޭނުންނުކުރެވޭނެ ކަމަށް ޙުކުމްކޮށްދެއްވުމަށް ކޯޓްގައި އެދިފައިވާ ކަމަށްވެސް އެ ޖަމިއްޔާއިން ބުނެއެވެ.