ސޯވިއެޓް ޔޫނިއަންގެ ކިބައިން ކަޒަޚްސްތާން އަށް މިނިވަންކަން ލިބުނީއްސުރެ އެޤައުމުގެ ވެރިކަން ކުރައްވަމުން ގެންދެވި ރައީސް ނޫރްސުލްތާން ނަޒަރްބާޔެވް، މަޤާމުން އިސްތިއުފާދެއްވައި އެކަން އިއުލާންކުރައްވައިފި އެވެ.
ޓީވީ މެދުވެރިކޮށް ރައްޔިތުންނާއި މުޚާބަތުކުރައްވައި ދެއްކެވި ވާހަކަފުޅުގައި ނަޒަރްބާޔެވް ވިދާޅުވީ އެ ނިންމުމަކީ ފަސޭހަ ނިންމުމެއް ނޫން ކަމަށެވެ.
އުމުރުން 78 އަހަރުފުޅުގެ ނަޒަރްބާޔެވް، ތެލުގެ މުއްސަނދިކަން ލިބިފައިވާ ކަޒަޚްސްތާންގެ ވެރިކަމާއި ހަވާލުވެވަޑައިގެންނެވީ 1990 ވަނަ އަހަރުގެ އޭޕްރީލް މަހުގެ ތެރޭގައެވެ.
ފާއިތުވި އަހަރުތަކުގައި އެމަނިކުފާނު ވަނީ ޤައުމުގެ އިޤްތިޞާދު އިސްލާހުކުރައްވައި، ސިޔާސީ ނިޒާމް ޑިމޮކްރާތީކުރުމަށް ކުރެވުނު މަސައްކަތްތައް ހުއްޓުވުމަށް މަސައްކަތްކުރައްވައިފަ އެވެ.
ޤައުމާއި މުޚާތަބުކުރައްވައި ނަޒަރްބާޔެވް ވިދާޅުވީ އެމަނިކުފާނުގެ ދައުރުގެ ބާކީ އޮތް ދުވަސްތަކުގައި ރައީސްކަމުގެ މަޤާމާއި ވަގުތީ ގޮތުން ހަވާލުވެވަޑައިގަންނަވާނީ މަތީ މަޖިލީހުގެ ރައީސް، ކަސީމް-ޖޮމާޓް ޓޮކާޔެވް ކަމަށެވެ.