އައްޑޫ ސިޓީ އަންހެނުންގެ ތަރައްޤީއަށް މަސައްކަތްކުރާ ކޮމަޓީއިން 'ހަވާސް'ގެ ނަމުގައި ސުވާލު މުބާރާތެއް ބާއްވަން ނިންމައިފިއެވެ.
މި މަހުގެ 20 ވަނަ ދުވަހުން ފެށިގެން މުބާރާތް ކުރިއަށް ގެންދިއުމަށް ހަމަޖެހިފައިވަނީ 03 އެޕްރީލް 2019 ގެ ނިޔަލަށެވެ.
ރައްޔަތުންގެ މަޖިލީސް އިންތިހާބާއި ދިމާކޮށް ރައްޔަތުން ޤާނޫން އަސާސީއަށް އަހުލުވެރިކޮށް ހޭލުންތެރިކުރުމުގެ މަޤްސަދުގައި ބާއްވާ މި މުބާރާތާއި ބެހޭ ގޮތުން ޑަބްލިއުޑީސީގެ ރައީސާ އާއިޝަތު ނަދާ ވިދާޅުވީ މި މުބާރާތަކީ ދިވެހިރާއްޖޭގެ ތާރީހާއިބެހޭ މައުލޫމާތުތައް ރައްޔަތުންނަށް ފޯރުކޮށްދިނުމުގެ މަގްސަދު ގައި ކުރިއަށް ގެންދާ މުބާރާތެއް ކަމަށާއި މި މުބާރާތުގައި ދިވެހި ކޮންމެ ރައްޔަތަކަށްވެސް ބައިވެރިވެވޭނެ ކަމަށެވެ.
މީގެ އިތުރުން ޑަބްލިއުޑިސީ އިން ބުނީ މި މުބާރާތް ކުރިއަށް ގެންދިއުމަށް ހަމަޖެހިފައިވަނީ އަންހެނުންގެ ތަރައްޤީއަށް މަސައްކަތްކުރާ ކޮމަޓީގެ ރަސްމީ ފޭސްބުކް ޕޭޖް މެދުވެރިކޮށް ކަމަށެވެ.
މި ސުވާލު މުބާރާތުގައި ކޮންމެ ދުވަހަކު ހެނދުނު، ޑަބްލިއުޑީސީގެ ފޭސްބުކް ޕޭޖުން ސުވާލެއް ޕޯސްޓު ކުރާނެއެވެ.
އަދި އެ ސުވާލުގެ ޖަވާބު ދިނުމުގެ ސުންގަޑި، އެ ދުވަހެއްގެ ރޭގަނޑު 00:00 ކަމަށާއި އޮންނާނެކަމަަށް ޑަބްލިއުޑީސީން. ބުނެއެވެ.
ސުވާލުތަކުގެ ޖަވާބު ފޮނުވާނީ އަންހެނުންގެ ތަރައްޤީއަށް މަސައްކަތްކުރާ ކޮމަޓީގެ ފޭސްބުކް ޕޭޖަށް މެސެޖް ކޮށްގެންނެވެ.
މި މުބާރާތުގެ ނަތީޖާ ފާޅުކުރުމަށް ހަމަޖެހިފައިވަނީ އަންހެނުންގެ ދުވަހުގެ މުނާސަބަތުގައި 13 އެޕްރީލް 2019 ވަނަ ދުވަހު ބާއްވާ ' ދިޔަގެ ހެވި' ފެސްޓިވަލްގައެވެ.
މި މުބާރާތުގައި އެއްވަނަ، ދެވަނަ އަދި ތިންވަނަ އަށްދާ ފަރާތްތައް ހޮވުމަށް ހަމަޖެހިފައިވާއިރު، އެއްފަރާތަށް ވުރެ ގިނަ ފަރާތްތަކުން ހުރިހާ ސުވާލެއްގެ ޖަވާބު ރަނގަޅުކޮށްފިނަމަ ވަނަތައް ހޮވާނީ އެފަރާތްތަކުގެ މެދުގައި ނެގޭ ގުރުއަތަކުން ކަމަށް ކޮމަޓީ އިންވަނީ ބުނެފައެވެ.