އައްޑޫ މަރުކަޒީ އިންޖީނުގޭގައި ބޭނުންކުރަމުންދާ އިންޖީނަކަށް ދިމާވި މައްސަލަ ހައްލުކުރުމަށް އިންޖިނިއަރުން ރޭ އައްޑުއަށް ގެނެވި މަސައްކަތް ކުރިއަށްދާ ކަމަށް ފެނަކަ ކޯޕަރޭޝަނުން ބުނެފިއެވެ.
"އައްޑޫލައިވް" އަށް މައުލޫމާތު ދެމުން ފެނަކަ ކޯޕަރޭޝަންގެ އޮފިޝަލަކު ބުނެފައިވަނީ މައްސަލަ ދިމާވެފައިވަނީ ފަހުން ބޭވުނު 2 މެގަ ވަޓްގެ އިންޖީނަކަށް ކަމަށެވެ.
އިންޖީނަކަށް ދިމާވި މައްސަލައަކާ ގުޅިގެން އިއްޔެ އައްޑޫގެ ގުޅިފައިވާ ފަސް ރަށުން ކަރަންޓު ކަނޑަން ފަށާފައިވާއިރު ބައެއް ހިސާބުތަކުން ގަޑިއިރަކަށް ވުރެ ގިނަ އިރު ވަންދެން ކަރަންޓު ކެނޑި އާންމުންގެ ޝަކުވާ ވަނީ ލިބިފައެވެ.
އައްޑޫގައި ބޭނުންކުރާ އިންޖީނުތަކަށް މައްސަލަ ދިމާވެ ކަރަންޓު ކެނޑުމަކީ އާންމު ކަމަކެވެ.