ސ. ގަން އެއާޕޯޓް ގާއިމުކޮށްފައިވާ ގަމުގަަައި އެއާޕޯޓް ހޮޓަލެއް ތަރައްގީ ކުރަން ނިންމައި އެކަމަށް ފުރުސަތު ހުޅުވާލައިފި އެވެ.
އައްޑޫ އިންޓަނެޝަނަލް އެއާޕޯޓް (އޭއައިއޭ) އިން ނެރެފައިވާ އިއުލާނެއްގައި ބުނެފައި ވަނީ ގަމުގައި އެއާޕޯޓް ހޮޓަލެއް ތަރައްގީކޮށް ހިންގުމުގެ ފުރުސަތު ރާއްޖޭގެ އިތުރުން ރާއްޖޭން ބޭރުގެ ކުންފުނިތަކަށް ވެސް ހުޅުވާލައިފައިވާ ކަމަށެވެ.
މި މަޝްރޫއަށް ޝައުގުވެރިވާ ފަރާތްތަކުން އެކްސްޕްރެޝަން އޮފް އިންޓްރަސްޓް (އީއޯއައި) ހުށަހެޅުމުގެ ފުރުސަތު ޖުލައި މަހުގެ 15 ވަނަ ދުވަހާ ހަމައަށް މިހާރު ވަނީ ހުޅުވާލާފަ އެވެ.
މިކަމާ ގުޅޭ ގޮތުން ބާއްވާ ޕްރީބިޑް މީޓީން މި މަހުގެ 13 ވަނަ ދުވަހު މާލޭގައި ހުންނަ އެސްޓީއޯގެ ހެޑް އޮފީހުގައި ބާއްވާ ގޮތަށް ވެސް ވަނީ ހަމަޖެހިފަ އެވެ.
އޭއައިއޭ އިން ބުނީ ގަމުގައި އެއާޕޯޓް ހޮޓަލެއް ތަރައްގީކޮށް ހިންގަން ބަޔަކާ ހަވާލު ކުރަނީ 25 އަހަރުގެ މުއްދަތަށް ކަމަށާއި އެ މުއްދަތު އިތުރު 25 އަހަރަށް އިތުރު ކުރުމުގެ ފުރުސަތު ވެސް އޮންނާނެ ކަމަށެވެ.
އެ ކުންފުނިން އަދި ބުނީ ގަމުގައި އެއާޕޯޓް ހޮޓަލެއް ތަރައްގީކުރާނީ ގަމުން އެކަމަށް އެންމެ އެކަށީގެންވާ ސަރަހައްދެއްގައި ކަމަށެވެ. އެގޮތުން ރާއްޖެ އާއި ރާއްޖޭން ބޭރުގެ ޓޫރިސްޓުންނަށާއި ގަމުގައި ޓްރާންސިޓް ކުރާ ޕެސެންޖަރުންނަށް އެ ހޮޓަލުން ފެންވަރު ރަނގަޅު ހިދުމަތްތަކެއް ފޯރުކޮށް ދެވޭނެ ކަމަށް އޭއައިއޭ އިން ބުންޏެވެ.
ހޮޓަލެއް ތަރައްގީކޮށް ހިންގާ ފަރާތަކަށް އެތަނުގައި ރެސްޓޯރެންޓާއި ސްޕާ، ޖިމް، ސްޕޯޓްސް ސެންޓަރު އަދި ބުޓިކް ފިހާރަތައް ހިންގުމުގެ ފުރުސަތު ވެސް އޮވެ އެވެ.
އޭއައިއޭ އިން ބުނި ގޮތުގައި ގަމުގައި އެއާޕޯޓް ހޮޓަލެއް ތަރައްގީ ކުރަން ބަޔަކާ ހަވާލުކުރާ އިރު އެ ދާއިރާ އިން ތަޖުރިބާ ލިބިފައިވާ އަދި މާލީ ގޮތުން ވެސް ގާބިލް ބަޔަކާ މަޝްރޫއު ހަވާލުކުރަން ބަރަށް ބޮޑު އިސްކަމެއް ދޭނެ އެވެ.