ރައީސް އިބްރާހިމް މުހައްމަދު ސޯލިހްގެ ވެރިކަމުގެ ފަސް އަހަރު ނިމޭއިރު ރާއްޖޭގައި ބޯހިޔާވަހިކަމުގެ ހައްގުން މަހުރޫމުވެފައިވާ އެންމެ ދިވެހި ރައްޔިތަކުވެސް ނުހުންނާނެ ކަމަށް އެމަނިކުފާނު ވިދާޅުވެއްޖެއެވެ.
ރައީސް މިހެން ވިދާޅުވެފައިވަނީ ހުޅުމާލެ ދާއިރާއަށް އެމްޑީޕީން މަޖިލިސް އިންތިޚާބަށް ވާދަކުރާ ކެންޑިޑޭޓް، އަލީ ނިޔާޒްގެ ކެމްޕޭން ޖަލްސާގައި ވާހަކަ ދައްކަވަމުންނެވެ.
ރައީސުލް ޖުމުހޫރިއްޔާ ވިދާޅުވީ އެމަނިކުފާނަކީ، އެމްޑީޕީ އަކީ ވައުދުވާ ޕާޓީއެއް ކަމަށާއި އަދި ވައުދު ފުއްދަވާ ޕާޓީއެއް ކަމަށެވެ. އެހެންކަމުން ބޯހިޔާވަހިކަމުގެ ވައުދުވެސް އެމަނިކުފާނުގެ ސަރުކާރުން ފުއްދަވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނުގެ ސަރުކާރުން މިހާރު ގެންދަނީ ބޯހިޔާވަހިކަމަށް ޖެހިފައިވާ ދިވެހި ރައްޔިތުންގެ މައުލޫމާތު އެއްކުރުމުގެ މަސައްކަތް ކުރަމުން ކަމަށެވެ. އަދި އެ މައުލޫމާތު ލިބި، ރައްޔިތުންނަށް އަތް ފޯރާ ފަށުގައި ފްލެޓު ފަދަ ބޯހިޔާވަހިކަން ފޯރުކޮށްދެވޭނެ ކަމަށް ރައީސް ވިދާޅުވެފައިވެއެވެ.
ކުރީގެ ސަރުކާރުން ވެސް ބޯހިޔާވަހިކަމުގެ ވައުދުތައް ވެފައިވާ ކަމަށާއި ނަމަވެސް ބޯހިޔާވަހިކަން ފޯރުކޮށްދިނުމުގެ ސިޔާސަތުން ބޯހިޔާވަހިކަމަށް ބޭނުންވެފައިވާ ރައްޔިތުންނަށް އެކަމެއް ހާސިލެއް ނުވެވުނު ކަމަށާއި ބައެއް ފްލެޓުތައް ފެނިފައިވެސް ނުވާކަމަށް ރައީސް ވިދާޅުވިއެވެ.
ރައީސް ސޯލިހް ވަނީ އެމަނިކުފާނުގެ ވައުދުތައް ފުއްދުމަށް ބޭނުންވާ ގާނޫނީ ބާރުވެރިކަން ހޯދުމަށް، އެމްޑީޕީގެ ކެންޑިޑޭޓުންނަށް ވޯޓު ދެއްވުމަށް ގޮވާލާފައެވެ.