ކޮންމެ ހުކުރު ދުވަހަކު ގާޒާ ބޯޑަރު ކައިރީގައި ކުރިއަށްގެންދާ މުޒާހަރާތަކުގެ ތެރެއިން، އިއްޔެ ބޭއްވި މުޒާހަރާގައި އިސްރާއީލްގެ ސިފައިން، ފަލަސްތީންގެ ދެ ރައްޔިތެއްގެ ގަޔަށް ބަޑިޖަހައި މަރާލައިފި އެވެ.
ހެލްތު މިނިސްޓްރީގެ ތަރުޖަމާނު އަޝްރަފް އަލް-ޤިދްރާ އާއި ހަވާލާދީ "އަލްޖަޒީރާ" އިން ރިޕޯޓްކުރާ ގޮތުގައި މަރުވެފައި ވަނީ މުޒާހަރާގެ ދެ ބައިވެރިން ކަމުގައިވާ އުމުރުން 18 އަހަރާއި 29 އަހަރުގެ ދެ ފިރިހެނުން ކަމަށެވެ. އަދި އެ ދެ މީހުން މަރާލާފައި ވަނީ ވަކި ވަކިން ހިނގި ދެ ހާދިސާއެއްގައި ކަމަށްވެސް އޭނާ ބުނެއެވެ.
އެގޮތުން ޖިހާދް ހިދްރާ މަރާލާފައި ވަނީ ގާޒާ ސިޓީގެ އިރުމަތިން އޭނާގެ ބޮލަށް ބަޑި ޖަހައި ކަމުގައިވާއިރު، 29 އަަހަރުގެ ނިދާލް ޝަތާތު މަރާލާފައި ވަނީ މެދު ގާޒާގެ އަލް-ބުރެއިޖް ރެފިއުޖީ ކޭމްޕް ކައިރީގައެވެ. އޭނާ މަރާލާފައި ވަނީ މޭމައްޗަށް ބަޑިޖަހައިގެންނެވެ.
އިސްރާއީލްގެ ސަލާމަތީ ބާރުތަކުން ދިން ހަމަލާތަކުގައި މަދުވެގެން ފަލަސްތީންގެ 62 ރައްޔިތުންނަށް އަނިޔާވެފައިވާއިރު، އެމްބިއުލާންސްތަކަށް އަމާޒުކޮށް ކަރުނަ ގޭސް ޖަހާފައިވާ ކަމަށްވެސް އަލް-ޤިދްރާ ބުނެއެވެ.
އަނިޔާލިބުމުގެ ސަބަބުން އިތުރު ފަރުވާ އަށް ކައިރި ހޮސްޕިޓަލަކަށް ގެންދިޔަ މީހުންގެ ތެރޭގައި އަނަދޮލު އޭޖެންސީގެ ފޮޓޯޖާނަލިސްޓެއް ކަމުގައިވާ އަލީ ޖާދަﷲ ވެސް ހިމެނެއެވެ.