ސ. ގަން އިންޓަނެޝަނަލް އެއާޕޯޓްގައި ރިނިވެބަލް އެނާޖީ ނުވަތަ އިޔާދަ ކުރަނިވި ހަކަތަ ނިޒާމެއް ގާއިމު ކުރަން ނިންމައި އެކަން ކުރަން ޝައުގުވެރިވާ ފަރާތްތަކަށް އެއާޕޯޓް ހިންގާ އައްޑޫ އިންޓަނެޝަނަލް އެއާޕޯޓް (އޭއައިއޭ) ފުރުސަތު ހުޅުވާލައިފި އެވެ.
އެ ކުންފުނިން ގަން އެއާޕޯޓްގައި ގާއިމު ކުރާ އިޔާދަ ކުރަނިވި ހަކަތަ ޕްރޮޖެކްޓް ހިންގުމަށް ޝައުގުވެރިވާ ރާއްޖެ އާއި ރާއްޖޭން ބޭރުގެ ފަރާތްތަކަށް ފުރިސަތު ހުޅުވާލާފައިވާ އިރު އެކްސްޕްރެޝަން އޮފް އިންޓްރަސްޓް (އީއޯއައި) މި މަހުގެ 30 ގެ ކުރިން ހުށަހަޅަން ޖެހޭނެ ކަމަށެވެ.
އަދި މިކަމާ ބެހޭ ގޮތުން ބާއްވާ ޕްރީ ބިޑް މީޓިން މި މަހުގެ 12 ވަނަ މާލޭގައި ހުންނަ އެސްޓީއޯގެ ހެޑް އޮފީހުގައި އޮންނާނެ ކަމަށް ވެސް އޭއައިއޭ އިން ބުންޏެވެ.
އޭއައިއޭ އިން ބުނީ އެއާޕޯޓްގައި ފޮޓޯވޮލްޓިކް ނިޒާމެއް ނުވަތަ އިޔާދަ ކުރަނިވި ހަކަތައިގެ އެހެން ނިޒާމެއް ވެސް ގާއިމު ކުރެވިދާނެ ކަމަށެވެ.
އެގޮތުން އުފައްދާ ކަރަންޓް އެއާޕޯޓާއި އެ ކުންފުނީގެ ދަށުގައި ގަމުގައި ހުރި އެހެން ތަންތަނަށް ވެސް ފޯރުކޮށް ދެވިދާނެ ކަމަށާއި އަދި އުފައްދާ ކަރަންޓް އޭއައިއޭ އެކު ވެވޭ އެއްބަސްވުމެއްގެ ދަށުން ތިން ވަނަ ފަރާތަކަށް ވެސް ވިއްކާ ލެވިދާނެ ކަމަށް އޭއައިއޭ އިން ބުންޏެވެ.
އަދި ގަމުގައި ގާއިމު ކުރާ ނިޒާމުން އުފައްދާ ކަރަންޓް ވިއްކަން ޖެހޭނީ އޭއައިއޭ އާއި އެ މަޝްރޫއު ކުރިއަށް ގެންދާ ކުންފުންޏަކާ ދެމެދު ވެވޭ އެއްބަސްވެވޭ އަގަކަށް ކަމަށް ވެސް އޭއައިއޭ އިން ބުންޏެވެ. އެގޮތުން
މިކަމަށް ކަނޑައެޅޭ ފަރާތަކާ އެކު އޭއައިއޭ އިން ޕަވަ ޕާޗެޒް އެގްރިމަންޓް (ޕީޕީއޭ) އެއްބަސްވުމެެއްގައި ސޮއި ކުރެވޭނެ ކަމަށް ވެސް އެ ކުންފުނިން ބުންޏެވެ.
އޭއައިއޭ އިން ބުނީ މި ޕްރޮޖެކްޓް ހަވާލު ކުރާނީ މި ދާއިރާ އިން ތަޖުރިބާ ލިބިފައިވާ މާލީ ގޮތުން ވެސް މިފަދަ މަޝްރޫއެއް ކުރިއަށް ގެންދެވޭނެ ފަދަ ކުންފުންޏަކާ ކަމަށެވެ.
ކަރަންޓް އުފެއްދުމަށް އެެއާޕޯޓްގައި އިޔާދަ ކުރަނި ހަކަތަ ޕްރޮޖެކްޓެއް ކުރިއަށް ގެންދަަން ނިންމި އިރު، އައްޑޫން ދޭތެރެ ދޭތެރެ އިން ކަރަންޓް ކެނޑޭ މައްސަލަ ކުރިމަތިވާތީ އެއާޕޯޓަށް ގިމަ ދަތިތަކަކާ ކުރިމަތިލާން ޖެހިފައިވެ އެވެ.