64 ވަނަ ވިމަލް އެލައިޗީ ފިލްމްފެއަރ އެވޯޑްސް 2019ގެ އެންމެ މޮޅު ފިރިހެން އެކްޓަރުގެ އެވޯޑް ރަންބީރު ކަޕޫރު ހޯދައިފިއެވެ.
ހޮނިހިރު ދުވަހުގެ ރޭ ބޭއްވުނު މި އެވޯޑް ހަފްލާގައި ރަންބީރު މި މަގާމް ދިފާއު ކޮށްފައިވަނީ އޭނާގެ ފިލްމް "ސަންޖޫ" އިންނެވެ. މި މަގާމަށް ވާދަކުރި އެހެން ތަރިންގެ ތެރޭގައި ފިލްމް"ފެޑްމޭން" އިން އަކްޝޭ ކުމާރު، "އަންދާދުން"އިން އަޔުޝްމަން ޚުރާނާ، "ސްތްރީ"އިން ރާޖް ކުމާރު ރާއޯ، "ފަދްމާވަތް" އިން ރަންވީރު ސިންގް، "ޒީރޯ" އިން ޝާހްރުކްޚާން އަދި ފިލްމް "ސަންޖޫ"އިން ރަންބީރު ކަޕޫރު ހިމެނެއެވެ. މޮޅެތި ތަރިންނާއި ވާދަކޮށް މިފަހަރު މިމަގާމް ހޯދާފައި މިވަނީ ރަންބީރު ކަޕޫރުއެވެ.
އެވޯޑް ހޯދުމަށްފަހު ރަންބީރު ވަނީ އެތަނުގައި ހާޒިރުވެތިބި ފަރާތްތަކާއި މުޚާތަބްކޮށް ޝުކުރު އަދާ ކޮށްފައެވެ. ފިލްމުގައި އެކި ގޮތްގޮތުން ހަރަކާތްތެރިވި އެންމެހާ ފަރާތްތަކަށް އޭނާ ވަނީ ޝުކުރުއަދާކޮށްފައެވެ. 10 ވަރަކަށް އަހަރު ފިލްމީ ދުނިޔޭގައި މަސައްކަތް ކުރެވިފައިވާކަން އެ ފުރުސަތުގައި އޭނާ ވަނީ ހާމަކޮށްފައެވެ. މުހިންމީ މޮޅެތި ނެށުންތަކެއް ނޫން ކަމަށާއި އެހެން ނަމަވެސް ބެލުންތެރިންގެ ހިތްތަކަށް ވެރިވެގަނެވޭފަދަ ހުނަރުތަކެއް ކަމަށް ވެސް އޭނާ ވަނީ ބުނެފައެވެ.
މިއީ ރަންބީރުގެ 3 ވަނަ ފިލްމްފެއަރ އެވޯޑެވެ. މީގެ ކުރިން އޭނާއަށް ވަނީ ފިލްމް" ރޮކް ސްޓާރ" އަދި "ބަރްފީ"އިން ވެސް މި އެވޯޑް ހާސިލްކޮށްފައެވެ.