ޏ. ފުވައްމުލަކުގައި ރޭ ފަތިހު ތޫނު އެއްޗަކުން ހަމަލާދީ 17 އަހަރުގެ ޒުވާނަކު ޒަހަމްކޮށްލައިފިއެވެ.
މައުލޫމާތު ލިބިފައިވާ ގޮތުގައި ޒަހަމްކޮށްލާފައިވަނީ އެރަށުގައި ހިންގާ ޓައިގަރ ޝާރކް ރެސިޑެންސް ގެސްޓް ހައުސްގައި މަސައްކަތް ކުރާ 17 އަހަރުގެ ކުޑަކުއްޖެކެވެ. އޭނާއަށް ހަމަލާ ދީފައިވަނީ ޑިއުޓީއަށް ދިޔަ ގަޑީގައި ކަމަށް މައުލޫމާތު ލިބެއެވެ.
ފުލުހުންގެ މީޑިއާ އޮފިޝަލް ވިދާޅުވީ މރޭ ފަތިހު 5:50 ހާއިރު ފުވައްމުލަކު މާދަޑު ގެސްޓު ހައުސްއެއްގެ ކުރިމަތިން 17 އަހަރުގެ ކުއްޖަކަށް ތޫނު އެއްޗަކުން ހަމަލާދީ ޒަހަމްކޮށްލާފައިވާ ކަމަށާއި އެކުއްޖާއަށް ފުވައްމުލަކު ހޮސްޕިޓަލްގައި ފަރުވާ ދެމުން އަންނަ ކަމަށެވެ.
ފުލުހުން ބުނީ އެކުއްޖާގެ ބޮލަށާއި އަތަށް ތޫނު އެއްޗަކުން ހަމަލާދީފައިވާ ކަމަށެވެ. އަދި އެކުއްޖާގެ ހާލު ސީރިއަސް ނޫން ކަމަށް ފުލުހުން ބުނެއެވެ.
މި ހާދިސާ އާއި ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވެއެވެ. ނަމަވެސް ފުލުހުން ދަނީ މި މައްސަލަ އާއި ގުޅުން ހުރި ފަރާތްތައް ހޯދުމުގެ މަސައްކަތް ކުރަމުންނެވެެ.