(ޖޫން 8، 2013 ވަނަ ދުވަހުގެ ބަޔާ ގުޅޭ)
"މިހިރީނު ރާނިޔާ ދައްކަބަލަ ތި އެއްޗެހި."
ދެން ހުރިހާ ވާހަކައެއް ދިޔައީ އެ މީހުންނަށް ދިމާވެގެން އުޅޭ މައްސަލަތަކުގެ ވާހަކަ އެވެ. ހައްލު ކުރަން ބެނުންވާ ކަންތައްތަކުގެ ވާހަކަ އެވެ.
އެންމެ ފަހުން މިސްބާހް ހުރިހާ ޑޮކިޔުމަންޓްތަކެއް އަހަރެންނާ ހަވާލު ކުރި އެވެ. އެ މަސައްކަތްތަކަކީ އަހަރެންގެ ފީލްޑުގެ މަސައްކަތެއްވީމާ އަހަރެން އެ ޕްރޮޖެކްޓާ ހަވާލުވީމެވެ. އަހަރެމެން ތިން ހަތަރު ގަޑި އިރުގެ އޮފިޝަލް ވާހަކަ ދެއްކުމަށް ފަހު ކޮފީ މޭޒަށް ދިޔައީމެވެ.
މިސްބާހްއަކީ ވަރަށް މަޖާ މިޒާޖެއްގެ ޒުވާނެކެވެ. މިވީ ކުޑަ ވަގުތުކޮޅުތެރޭ އަހަރެންނާއި މިސްބާހް ވަރަށް އެކުވެރި ވެއްޖެ އެވެ. މިސްބާހް ވީ ވެސް އަހަރެންނަށް ވަރަށް ކަމުދާ އެކުގައި މަސައްކަތް ކުރާ ހިތްވާ ކަހަލަ މީހަކަށެވެ.
"މިސްބާހް އާއި ރާނިޔާ ތީ އެއް ހިސާބެއްގެ ދެ ކުދިން،.އެކަކު އަނެކަކު ނުދަންނަންތަ؟" މުނީރުގެ މި ވާހަކައިން ސިހިފައި އަހަރެން މިސްބާހްގެ މޫނަށް ބަލާލީމެވެ. މިސްބާހް ވެސް ހަމަ މިފަދަ ގޮތަކަށް އަހަރެންނަށް ބަލާލި އެވެ.
"މިސްބާހް ކޮން ގެެއެއް؟" އަހަރެން ހަމަ ޖެހިލަން މަސައްކަތް ކުރަމުން އަހާލީމެވެ.
"އަހަރެން ކުރެސްޓުގެ." މިސްބާހް މިހެން ބުނުމާ އެކު އަހަރެން ކޮފީ ވެސް ކޮށި އެރި އެވެ. އެހެން ނުވާން ވީ ކީއްވެތޯ އެވެ. ކުރިމަތީ މީނީ ރިޔާސްގެ ކޮންމެވެސް މީހެކެވެ. އާނއެކެވެ. އޭނާގެ ކޮއްކޮ އެވެ. އަހަރެންގެ ހިތް ފަޅިފަޅިކޮށްލި ރިޔާސް ގެ އާއިލާ މީހާ އެވެ.
މިއަދު އަހަރެންނަށް މި އެއްބަސް ވެވުނީ މި މީހުންގެ ވިޔަފާރީގައި އެހީވެ މި މީހުންނާ އެކީ އުޅޭށެވެ. މީ މަގޭ ތަގުދީރެވެ. އަހަރެން ކިޔެވީ ބަދަލު ހިފުމަށެވެ. އެކަމަކު ރަށަށް އައިސް އަހަރެންނަށް ޙިދުމަތްކޮށް ދޭން މިޖެހުނީ އެ މީހުންނަށެވެ. ތަގުދީރުގެ ރޭވުން ކިހާ މޮޅު ހެއްޔެވެ؟ އަހަރެންގެ ހިމޭންކަން ދެކެފައި މިސްބާހް ވާހަކަ ދައްކަން ފެށި އެވެ.
"އަސްތާ ރާނިޔާ ކިހިނެއްވީ…ދަންނަ ގެއެއްތަ؟" މިސްބާހް ހެވިލާފައި އަހާލި އެވެ. އަހަރެން އާނއެކޭ ބުނާ ގޮތަށް ބޯޖަހާލީމެވެ.
"އެ ގެއިން ކާކު ދަންނަނީ؟" މުނީރު ވެސް އަހާލިއެވެ.
"ކޮބާ ރިޔާސް؟ " އަހަރެން ސުވާލުކޮށްލީމެވެ.
"އޭނަ އެބައުޅޭ. ޓީޗަރަކަށް އުޅެނީ."
"އަހަރެން އަތުގަ އެބަ އޮތް އޭނަގެ އަމާނާތެއް. ބުނޭ އޭނަ ކައިރީ ފިޔާޒާ އައިއްސިޔޭ. ފޮތް ވެސް ހަވާލު ކުރަން ބޭނުމޭ." އެ ދުވަހު ގެޔަށް އައިސް އަހަރެން ރުއީމެވެ. އެކަމަކު މިއަދު އަހަރެން ރުއީ ވޭނީ ރުއިމެއް ނޫނެވެ. އެއީ އުފާވެރިކަމުުގެ ރުއިމެވެ. އަހަރެން އެމީހުންނަށް އެހީވާނަމެވެ. ހިތާ ހިތުން އަހަރެން ވައުދުވީމެވެ.
ދެތިން ދުވަސް ފަހެވެ، މިސްބާހް އަހަރެންނާ ބައްދަލު ކުރި އެވެ. އެކަމަކު ހުރީ އުފަލުންނެއް ނޫންކަން ވަރަށް ރަނގަޅަށް އެކަން އެނގެ އެވެ.
"މާ މޫޑް އޮފް ވެފަ ކިހިނެއްވީ؟" އަހަރެން ސުވާލުކޮށްލީމެވެ.
"ރިޔާސް އާ ދިމާވެފަ މިއައީ. އޭނަ ވަރަށް ސަކަރާތް."
"އޭނ…އަނެއްކާ ކިހިނެއްވީ؟" އަހަރެން މިސްބާހްގެ ވާހަކަ ހުއްޓުވީމެވެ. އަހަރެންގެ ކެތްތެރިކަން ކޮޅުން ލަމުން ދިޔަ އެވެ. "މިސްބާހް ވީ ކީއް ބުނެބަލަ؟"
އަހަރެންގެ މާޔޫސީ ދެކެފައި މިސްބާހް ވެސް ހައިރާންވި އެވެ.
"އޭނަ ޤަބޫލެއް ނޫން ރާނިޔާ އަށް ގުޅާކަށް އަދި ވާހަކަވެސް ދައްކާކަށް. އަދި އޭނަގެ ނަމްބަރު ވެސް ދޭކަށް އޭނާ ޤަބޫލެއް ނޫން."
އަހަރެންނަށް ބާރަށް ހީގަނެވުނެވެ.
"މިސްބާހް ބުނިންތަ އަހަރެންގެ ނަން؟"
"އާނ ތި ނަން ބުނިން. ތީ ކޮން ކުއްޖެއްކަން ކިޔައި ދިނިން. ބުނިން ވަރަށް ކިޔަވައިގެން އައި މޮޅު ކުއްޖެކޭ. މިވާހަކަ އިވުނީމަ އޭ ކުއްލިއަކަށް އޭނަ މޫޑް ބަދަލުވީ." މިސްބާހްގެ މި ވާހަކަ އަށް އަހަރެން ބާރަކަށް ހީގަތީމެވެ.
އަހަރެންގެ ހަޔާތުގައި މިގޮތަށް އަހަރެންގެ އެކުވެރި ރިސާލާމެންނާ އެކު އުޅުނު އިރު ހީހީފައި އުޅުނީމެވެ. އެއީ މީގެ ސާދަ އަހަރު ކުރި އެވެ. ޑިސެމްބަރު 27، 1991 ވަނަ ދުވަހުގެ ފަހުން މިގޮތަށް އަހަރެން ހުނި މިއީ ފުރަތަމަ ދުވަހެވެ.
ކޮންމެ ހުކުރު ދުވަހަކު އަހަރެން ވަކި މީހެއްގެ އަނިޔާވެރި ބަސްތައް ތާޒާ ކުރަމެވެ. އެ ދުވަހަކީ ވެސް ހަމަ ހުކުރު ދުވަހެކެވެ.
މި ދުވަސް އަހަރެން ދުވަހަކު ވެސް ހަނދާން ނުނެތޭނެ އެވެ. އެއީ ރިޔާސްގެ ބަސްތަކުން އަހަރެން މަރާލި ދުވަހެވެ. އެހެން ގޮތަކަށް ބުނާނަމަ އަހަރެންގެ ގަނޑުވަރު ބިމާ ހަމަކޮށް ހަލާކުކޮށް އަހަރެން ރޮއްވާލި ދުވަހެވެ. އެކަމަކު ދެން އަހަރެން އެ އަނިޔާވެރިޔާގެ ހަނދާން ނައްތާލެވޭތޯ މަސައްކަތް ކުރާނަމެވެ.
(ނުނިމޭ)