ނަފްސާނީ ބަލިތަކަށް ފަރުވާދޭ މަރުކަޒެއް އައިޖީއެމްއެޗުގައި މިއަދު ހުޅުވައިފިއެވެ.
އައިޖީއެމްއެޗުގައި އެކަމަށްޓަކައި އޮތް ރަސްމިއްޔާތެއްގައި "ސެންޓަރ ފޯރ މެންޓަލް ހެލްތު"ގެ ނަމުގައި މަރުކަޒު ހުޅުވައިދެއްވީ ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިހެވެ.
މި ރަސްމިއްޔާތުގައި ވާހަކަފުޅުދައްކަވަމުން ރައީސް ޞާލިޙު ވިދާޅުވީ މިއަދު ހުޅުވިގެންދިޔަ ނަފްސާނީ ބަލިތަކަށް ފަރުވާދޭ މަރުކަޒުގެ ސަބަބުން އެތައް ބަޔަކަށް އެކަމުގެ ސަބަބުން ލުއިތަކެއް ލިބިގެންދާނެ ކަމަށާއި މި މަރުކަޒުން ދޭ ޚިދުމަތްތައް ފުޅާ ކުރުމަށް ކުރިއަށް އޮތްތަނުގައި ވެސް ސަރުކާރުން މަސައްކަތް ކުރާނެ ކަމަށެވެ.
މި މަރުކަޒު މެދުވެރިކޮށް ނަފްސާނީ ބަލިތަކަށް ދިވެހިން ހޭލުންތެރި ކުރުވުމުގެ މަސައްކަތް ކުރިއަށްދިއުމުގެ އިތުރުން ކައުންސިލިންގެ ޚިދުމަތްވެސް މި މަރުކަޒުން ދިނުމަށް ނިންމާފައިވާއިރު މި މަރުކަޒުގެ ދެވަނަ ފިޔަވައްސެއް ވެސް އޮތް ކަމަށް އައިޖީއެމްއެޗުން ބުނެއެވެ.
މިއަދު ހުޅުވިގެން ދިޔަ މި މަރުކަޒުން އާސަންދައިގެ ޙިދުމަތް ލިބޭއިރު މިއީ ރައީސް ސޯލިހުގެ އެ ވެރިކަމުގެ 100 ދުވަހުގެ ތެރޭގައި ސިއްޙީ ދާއިރާއިން ކުރުމަށް ނިންމާފައިވާ ކަމެކެވެ.