އެމެރިކާގެ ރައީސް ޑޮނަލްޑް ޓްރަމްޕް މަގާމަށް އައުމަށް 2016 ވަނަ އަހަރު ކުރި ރިޔާސީ ކެމްޕޭނުގައި ރަޝިޔާގެ އަތެއް ނެތް ކަމަށް ތަހުގީގީ ރިޕޯޓުން ހާމަކޮށްފިއެވެ.
ޓްރަމްޕްގެ ކެމްޕޭނުގެ ޚާއްސަ ތަހުގީގީ ރިޕޯޓު ހަދާފައިވަނީ ސްޕެޝަލް ކައުންސެލް ރޮބާޓް މުލާއެވެ. މުލާ އޭނާގެ ރިޕޯޓް އެމެރިކާގެ އެޓާނީ ޖެނެރަލްއަށް ވިލިއަމް ބާ އަށް ފޮނުވާފައިވާއިރު ބާ ވަނީ ރިޕޯޓާ ގުޅޭ ޚުލާސާއެއް ކޮންގްރެސްއަށް ފޮނުވާފައެވެ.
ރިޕޯޓުން ޓްރަމްޕް ރަޝިޔާއާއި ސީދާ ގުޅުމެއް ބޭއްވިކަން ސާބިތުވާނެ ހެއްކެއް ނެތް ކަން ހާމަކޮށްފައިވާއިރު ޓްރަމްޕް ވަނީ ޓުވީޓަކުން އޭނާގެ ކުށެއް ނެތް ކަމަށް އިއުލާންކޮށްފައެވެ. ޓްރަމްޕް ވިދާޅުވީ ނުފޫޒު ފޯރުވިކަން ސާބިތުނުކުރެވޭނަމަ އޭނާ ކުށެއް ކުރިކަން ސާބިތެއް ނުވާނެ ކަމަށެވެ.
މުލާގެ ރިޕޯޓް އެޓާނީ ޖެނެރަލް އާންމު ނުކުރުމުން އޭނާއަށް އިދިކޮޅު މެމްބަރުން ވަނީ ފާޑުކިޔުންތައް އަމާޒުކޮށްފައެވެ. ރިޕޯޓުން އެނގުނު ކަންތައް ކޮންގްރެސްއާ ތަފްސީލުކޮށް ހިއްސާ ކުރުމަށް މެމްބަރުން ވަނީ ގޮވާލާފައެވެ.
މުލާގެ ތަހުގީގީ ރިޕޯޓު ބިނާ ކުރުމުގައި 22 މަސް ދުވަސް ވަނީ ހޭދަކޮށްފައެވެ. އޭނާގެ ތަހުގީގުން ގާނޫނާއި ޚިލާފު ކަންކަން ފެނި، ޓްރަމްޕްގެ ކުރީގެ ވަކީލު މައިކަލް ކޯހެން އަދި ކުރީގެ ކެމްޕޭނު ޗެއާމަން ޕައުލް މަނަފޯޓްގެ އިތުރުން 32 މީހަކާ ދެކޮޅަށް ދައުވާވެސް ވަނީ ކޮށްފައެވެ.