ވިހެއުމުން އަންހެން މުވައްޒަފުންނަށް ޗުއްޓީދޭ ފުރަތަމަ އަމިއްލަ ކުންފުންޏަށް ހެޕީ މާކެޓު ވެއްޖެއެވެ.
ހެޕީ މާކެޓުން ވަނީ ވިހެއުމުން އަންހެން މުވައްޒަފުންނަށް ހަ މަސް އަދި ފިރިހެން މުވައްޒަފުންނަށް 1 މަސް ދުވަހުގެ ޗުއްޓީދޭން ނިންމާފައެވެ.
ވިހެއުމުން އަންހެން މުވައްޒަފުންނަށް ހަމަސް ދުވަހުގެ ޗުއްޓީ ދިނުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ. އެމަނިކުފާން ވަނީ ސަރުކާރު މުވައްޒަފުންނަށް މެޓާނިޓީ ލީވް ހަމަހަށް އަދި ޕެޓާނިޓީ ލީވް 1 މަހަށް ދޭން ފައްޓަވާފައެވެ. އަދި ސަރުކާރު ހިއްސާވާ ކުންފުނިތަކާއި އަމިއްލަ ކުންފުނިތަކުންވެސް މި ގޮތަށް ޗުއްޓީ ހަމަޖެއްސުމަށް ރައީސް ވަނީ އިލްތިމާސް ކުރައްވާފައެވެ.
ހެޕީ މާކެޓުގެ ސީއީއޯ އަލީ އިހްސާން ވިދާޅުވީ އެކުންފުނިން މައިންނަށް ހަމަހުގެ ޗުއްޓީއެއް ދޭން ނިންމީ އެކަނބަލުންގެ އަގު ވަޒަން ކުރުމުގެ ގޮތުން ކަމަށެވެ.
ހެޕީމާކެޓަކީ ރާއްޖޭގައި ފުޅާދާއިރާގައި ވިޔަފާރި ކުރަމުން އަންނަ ކުންފުންޏެކެވެ.