އައްޑޫ އިތުރަށް ވީރާނާ ކުރުމަށް ފުރުސަތު ނުދެވޭނެކަމަށް ހިތަދޫ މެދު ދާއިރާއަށް ވާދަކުރައްވާ ކެންޑިޑޭޓު ހުސެއިން ސޯލިހު ވިދާޅުވެއްޖެއެވެ.
މަޖްލިސް އިންތިހާބުގެ ކެމްޕެއިންގެ ކަންމަތީ ބައްދަލުވުމުގައި ވާހަކަ ދައްކަވަމުން ހުސެއިން ސޯލިހު ވިދާޅުވީ މިއަދު އައްޑޫ އޮތީ ވަރަށް ނިކަމެތި ހާލަތެއްގައި ކަމަށެވެ. އަދި މިހާލަތުން އަރައިގަތުމަށް ރައްޔިތުން އެކުގައި މަސައްކަތް ކުރަން ޖެހޭ ކަމަށް ހުސެއިން ސޯލިހު ވިދާޅުވިއެވެ.
ފާއިތުވި ސަރުކާރު ތަކުން އައްޑޫގެ ކަރަންޓުގެ ކަންކަން ރަނގަޅު ކުރުމަށް އެކަށީގެންވާ މަސައްކަތެއް ނުކޮށް އޮތުމުގެ ނަތީޖާއެއްގެ ގޮތުން މިއަދު އިރުއިރުކޮޅާ އައްޑޫގެ އެކި ސަރަހައްދުތަކުން ދަނީ ކަރަންޓު ކަނޑަމުންނެވެ. މި މައްސަލައަށް އިޝާރާތް ކުރައްވައި ހުސެއިން ސޯލިހު ވިދާޅުވީ މަޖްލިސް މެމްބަރުންގެ ޒިއްމާ ފުރިހަމައަށް އަދާކުރެވުނު ނަމަ މިއަދު މިހާލުގައި ރައްޔިތުން ތިބެން ނުޖެހޭނެކަމަށެވެ.
އިންތިހާބުގެ ކެމްޕެއިންގައި ހުސެއިން ސޯލިހުގެ ޝިއާރަކީ "އެޖެންޑާ 1972"އެވެ. އެއީ ގަމުގައި އިނގިރޭސިން ތިބެ އައްޑޫއަށް ބޮޑު ތަނަވަސްކަމެއް އައި ދުވަސްވަރެވެ. އެދުވަސްވަރު ގަމުގައި އިނގިރޭސިން އެންމެ މަތީ ފެންވަރުގެ ހޮސްޕިޓަލް ހިންގި އިރު އަތޮޅުގެ އެތައް ބަޔަކަށް ފަރުވާވަނީ ލިބިފައެވެ. އޭގެ ތެރޭގައި އެންމެ ބޮޑެތި އޮޕަރޭޝަންތައް ހިމެނެއެވެ.
1972 އަކީ އައްޑޫ ރައްޔިތުންގެ ފުދުންތެރިކަން އިތުރުވެ، މުޅި ދުނިޔެއަށް ލޯ ހުޅުވިގެން ދިޔަ ދުވަސްވަރެވެ. އޭރު މާލެ އާއި އަތޮޅުތަކުގެ މީހުން ބޭސް ފަރުވާއަށާއި އެނޫންކަން ކަމަށް އަންނަން ޖެހުނީ އައްޑޫއަށެވެ. އެހާލަތު ބަދަލުވީ ގަމުން އިނގިރޭސިން 1976 ވަނަ އަހަރު ފޭބި ހިސާބުން ގަމަށް އިނގިރޭސިން ދޫކޮށްލާފައި ދިޔަ ސާމާން އޭރުގެ ސަރުކާރުން ލޫޓުވައި އެތަންތަން ވީރާނާ ކޮށްލުމުންނެވެ. މިއަދު އައްޑޫއަކީ އާބާދީ ބޮޑު ވަސީލަތްތައް ހުރި ނަމަވެސް ވީރާނާވާން ދޫކޮށްލާފައިވާ ތަނެކެވެ.
ހުސެއިން ސޯލިހު ވިދާޅުވީ މި ހަނދާން އަދިވެސް އެބަހުރި ކަމަށާއި، ރައްޔިތުން މިއަދު ވިސްނަންވީ މާލެ ސަރުކާރަށް ސަލާން ޖަހަން ނުޖެހޭ ލާމަރުކަޒީ ފުރިހަމަ ނިޒާމެއް ގެނައުމަށްކަމަށެވެ. އެމަސައްކަތް ކުރުމުގައި ރައްޔިތުންނާއި އެކު ދެމިހުންނާނެ ކަމުގެ ޔަގީންކަން ދެއްވިއެވެ.
ހުސެއިން ސޯލިހު ވިދާޅުވީ މި ފަހަރުގެ މަޖްލިސްގެ ގޮޑިއަށް އޭނާ ރައްޔިތުން އިންތިހާބުކޮށްދެއްވައިފިނަމަ ރައްޔިތުންގެ އަޑު އުފުލުމުގައި ދެމި ހުންނާނެ ކަމަށެވެ. އަދި ވަކި ލީޑަރެއްގެ އޯޑަރަށް ކިޔަމަންވެ ރައްޔިތުން ދޫކޮށް ނުލާނެކަމަށެވެ. މީގެ އިތުރުން މެމްބަރެއްގެ ގޮތުގައި ސަރުކާރު ޖަވާބު ދާރީކޮށް، ސަރުކާރުން ރައްޔިތުންނަށް ގެނެސްދޭ ތަރައްޤީއަށް ފުރިހަމައަށް އެއްބާރުލުން ދޭނެކަމަށެވެ.