ވިހެއުމާއި ގުޅިގެން ޗުއްޓީ ދޭން އަހަރަކު 30 މިލިއަން ރުފިޔާ ޚަރަދު ވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެކަމަށް ބަޖެޓްގައި ފައިސާ ހިމަނާފައިވާނެ ކަމަށާއި އެކަމަށް ބޭނުންވާ ފައިސާ ދައުލަތުގެ ހަރަދު ކުޑަކޮށްގެން ވެސް ހޯއްދެވޭނެ ކަމަށް ރައީސް ޞާލިހް ވިދާޅުވި އެވެ.
މީގެ އިތުރުން ސިވިލް ސާވެންޓުންގެ ގޮތުގައި 16،300 އަންހެނުން ވަޒީފާ އަދާކުރަމުން ގެންދާ ކަމަށާއި، އަހަރަކު ހާހެއްހާ މީހުން ވިއުމުގެ ޗުއްޓީ ނަގާނެ ކަމަށް ލަފާ ކުރެވޭ ކަމަށް ރައީސް ވިދާޅުވިއެވެެ. އަދި ވިހެއުމާ ގުޅިގެން އަންހެނުންނަށް ދޭ ހަ މަސް ދުވަހުގެ ޗުއްޓީ އާއި ފިރިމީހާއަށް ދޭ ޗުއްޓީ އަށް 30 މިލިއަން ރުފިޔާ ހަރަދު ވާނެ ކަމަށް ރައީސް ވިދާޅުވިއެވެ.
ވިހެއުމުން އަންހެނުންނަށް ލިބޭނީ ހަމަސް ދުވަހުގެ ޗުއްޓީއެއް ކަމަށް ސަރުކާރުން ވިދާޅުވި ނަމަވެސް މިހާރު ސަރުކާރުން ސިވިލް ސާވިސް މުވައްޒަފުންގެ ޤަވައިދަށް ގެނެސްފައިވާ އިސްލާހުތައް ބުނާ ގޮތުން މުވައްޒަފަކު ބަލިވެ އިނުމުން ޑޮކްޓަރެއްގެ ލިޔުމެއް ހުށަހަޅައިފިނަމަ ވިހެއުމުގެ ކުރިން ވެސް އެއް މަސް ދުވަހުގެ ޗުއްޓީއެއް ލިބޭނެއެވެ.
ވިހެއުމާއި ގުޅިގެން ދޭ ޗުއްޓީއަށް އަހަރަކު 30 މިލިއަން ރުފިޔާ ދައުލަތުން ހޭދަކުރަން ޖެހޭ އިރު ސަރުކާރުގެ ވައުދުގެ ތެރޭގައި ހިމެނޭ އެތެރޭގެ އުދުހުންތަކުގެ އަގުހެޔޮ ކުރުމުގެ ވައުދުގެ ސަބަބުން މޯލްޑިވިއަން އަށް އަހަރަކު 128 މިލިއަން ރުފިޔާގެ ގެއްލުމަކާއި ކުރިމަތިވާނެ ކަމަށް ވެސް ސަރުކާރުން ވަނީ ވިދާޅުވެފައެވެ. ނަމަވެސް ޚަރަދު ކުޑަކޮށްގެން އެއަދަދު 60 މިލިއަން ރުފިޔާ އަށް ކުޑަ ކުރެވޭނެ ކަމަށް ސަރުކާރުން ވިދާޅުވެއެވެ.
ރައީސް ޞާލިހް ވިދާޅުވީ އަންހެނުންނަށް ވިހެމާއި ގުޅިގެން ހަ މަސް ދުވަހުގެ ޗުއްޓީ ދޭން ނިންމެވީ އެތައް ދިރާސާ ތަކެއް ހެދުމަށް ފަހުގައި ކަމަށެވެ.