ރައީސް އިބްރާހިމް މުހައްމަދު ސޯލިހްގެ ވެރިކަމުގައި ޖަލު ބަންދުގައި ހުރި މީހަކު، ގާނޫނީ އިމުގެ ތެރެއިން ނަމަވެސް މިނިވަންކުރެވުނީތީ މިއަދާ ހަމައަށް ވެސް ހިތާމަ ކުރައްވާ ކަމަށް ރައީސް ވިދާޅުވެއްޖެއެވެ.
"ރާއްޖެ ޓީވީ" ގެ ފަށާއިރު ޕްރޮގްރާމުގައި މިއަދު ބައިވެރިވެވަޑައިގެން ދެއްކެވި ވާހަކަފުޅުގައި އެމަނިކުފާނު ވިދާޅުވީ އެ ނިންމުމާ މެދު އަދިވެސް ހިތާމަ ކުރައްވާ ކަމަށާއި، މިހާރު، އެނިންމުން ނުނިންމެވުނު ނަމައޭ ވެސް ހިތްޕުޅަށް އަރާވަޑައިގަންނަވާ ކަމަށެވެ.
ރައީސް ސޯލިހް ވެރިކަމަށް ވަޑައިގަތްތާ މާގިނަ ދުވަސްތަކެއް ނުވެ، އެމަނިކުފާނު މިނިވަން ކުރެއްވީ ކުޑަކުއްޖަކަށް ޖިންސީ ގޯނާކުރި ކަމުގެ ކުށުގައި ހައްޔަރުކުރި ހޯރަ އިއްބެއެވެ.
ހޯރަ އިއްބެ މިނިވަން ކުރުމާއެކު ރައީސްއަށް ވަރަށް ބޮޑަށް ފާޑުކިޔުން އަމާޒުވިއިރު އެމްޑީޕީ އެކްޓިވިސްޓުންގެ މެދުގައި، އެ ނިންމުމަކީ ރައީސް ބޭނުންފުޅު ވެގެން ނިންމި ނިންމުމެއް ނޫން ކަމަށާއި، އެއީ ސިޔާސީ ގޮތުން އެމަނިކުފާނާ ކުރިމަތިވި ކަމެއް ކަމަށް ވެސް އަޑު ފެތުރުނެވެ.
ނަމަވެސް މިއަދާ ހަމައަށް ރައީސް އެކަމާ ގުޅޭގޮތުން އެއްވެސް އެއްޗެއް ވިދާޅުވެފައެއް ނުވެއެވެ. ރައީސް މިއަދު މިހެން ވިދާޅުވި ނަމަވެސް، އެއްވެސް މީހެއްގެ ނަމެއް ވިދާޅުވެފައެއް ނުވެއެވެ.
އެމްޑީޕީގެ އިސް އެކްޓިވިސްޓަކާ ދެކޮޅަށް ދައުލަތުން އުފުލި ގެވެށި އަނިޔާގެ ދައުވާއެއް ސާބިތުނުވުމާ ގުޅިގެންވެސް ސަރުކާރަށް ވަނީ މިދުވަސްކޮޅު ވަރަށް ބޮޑަށް ފާޑުކިޔުން އަމާޒުވެފައެވެ. އަނިޔާތަކުގެ ސަބަބުން އަންހެން މީހާ ނިޔާވެފައިވާއިރު އޭނާގެ ފިރިމީހާ އާ ދެކޮޅަށް ދައުލަތުން އުފުލި ދައުވާގައި ވަރަށް ގިނަ ހެކިތަކެއް ހުށައެޅި ނަމަވެސް ޝަރީއަތުގައި އެ ހެކިތަކަށް ރިއާޔަތް ކޮށްފައިނުވާ ކަމަށް ޕީޖީ އޮފީހުންވެސް ބުނެފައިވެއެވެ.
ނަމަވެސް އަދިވެސް ޕީޖީ އޮފީހުން އެ މައްސަލަ އިސްތިއުނާފު ކޮށްފައެއް ނުވެއެވެ. މީޑިޔާގައި އަޑުފެތުރިފައިވާ ގޮތުގައި ދައުވާ ލިބުނު މީހާއަކީ އެމްޑީޕީއަށް ނިސްބަތްވާ ނުފޫޒުގަދަ މީހެކެވެ.