ވެރިކަމަށް ވަޑައިގެން މިހިނގާ ދިޔަ ދުވަސްތަކުގައި އެންމެ އުނދަގޫ ކަމަކަށް ވެފައިވަނީ، ޕާޓީތަކުގެ މީހުންނަށް ސިޔާސީ މަގާމު ދިނުމާއި ވަކިކުރުމަށް ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ރައީސް، ރާއްޖެ ޓީވީގެ ޕްރޮގްރާމެއްގައި ވާހަކަ ދައްކަވަމުން ވިދާޅުވީ ޕާޓީތަކުން މަގާމުތަކަށް ޕާޓީތަކުގެ ބޭފުޅުން ނަން ހުށައެޅުމުން އެ މަގާމުތަކަށް މީހުން އައްޔަން ކުރުމުން އަބަދުވެސް ފާޑުކިޔުން އަމާޒުވާ ކަމަށެވެ. ރައީސް ވިދާޅުވީ ކޮންމެ ޕާޓީއަކުން ވެސް އެޕާޓީއެއްގެ މީހުނަށް ވަޒީފާ ދޭން އެދޭ ކަމަށާއި، ނުދީފިނަމަ ފާޑުކިޔަމުންދާ ކަމަށެވެ.
ބައެއް ޕާޓީތަކުގެ ލީޑަރުން ޕޯޑިއަމްތަކަށް އަރާވަޑައިގެން ވެސް އެވާހަކަ ދައްކަވަން ފައްޓާ ކަމަށާއި އެފަދަ ކަންކަމާ ދޭތެރޭ ހިތްޕުޅު ހަމަނުޖެހިވަޑައިގަންނަވާ ކަމަށް ނުސީދާ ގޮތުން ރައީސް ސޯލިހް ވިދާޅުވެފައިވެއެވެ.
ރައީސް ވިދާޅުވީ އެމަނިކުފާނުގެ ވެރިކަމުގައި ވަރަށް އުފާވެރި ދުވަސްތަކެއް ވެސް އަތުވެއްޖެ ކަމަށާއި، ވިހެއުމުން އަންހެން ކަނބަލުންނަށް 6 މަސް ދުވަހުގެ ޗުއްޓީއެއް ދިނުމަށް ނިންމެވި ނިންމުމަކީ އޭގެ ދުވަހެއް ކަމަށް ވިދާޅުވިއެވެ.
އަދި ފުރަތަމަ ޑިގްރީއަށް ހިލޭ ކިޔަވައިދިނުމުގެ ފުރުސަތު ދެވުނު ދުވަހާއި ސްޓޫޑަންޓް ލޯންތަކުން އިންޓްރެސްޓު ކުޑަ ކޮށްދެވުނީތީ ވެސް ފަޚުރުވެރިވާ ކަމަށް ރައީސް ވިދާޅުވިއެވެ.