ލަވް ރަންޖަންގެ ޑައިރެކްޝަނުން ދެން ފެނިގެންދާ އެކްޝަން ތްރިލާ ފިލްމުގައި އަޖޭ ދޭވްގަން އަދި ރަންބީރު ކަޕޫރު ފެނިގެންދާނެ ކަމަށް އިންޑިއާގެ ބައެއްް ނޫސްތަކުން ރިޕޯޓްކޮށްފިއެވެ.
އަދި ނަމެއް ދެވިފައިނުވާ މި ފިލްމަށް ލަވް ވިސްނާފައިވަނީ މި ދެތަރިން ކަމަށް ވެސް ރިޕޯޓްތައް ބުނެއެވެ. މިއީ ހަގީގަތަކަށް ވެއްޖެނަމަ މި ފިލްމު ވެގެންދާނީ މި ދެތަރިން އެކުގައި ފެނިގެންދާ ފުރަތަމަ ފިލްމަށެވެ.
އިތުބާރު ކުރެވޭފަދަ ގާތް ފަރާތަކުން ބުނެފައިވަނީ މި ފިލްމުގެ ސްކްރިޕްޓަށް ލަވް މަސައްކަތް ކުރަމުންދާތާ މިހާރު ގާތްގަނޑަކަށް ދެ އަހަރުވެފައިވާ ކަމަށެވެ.
ފިލްމުގެ ފުރަތަމަ ސްކްރިޕްޓް ނިމިފައިވާ ކަމަށާއި މި އަހަރު ނިމޭހާތާނގައި ފިލްމުގެ މަސައްކަތް ފެށޭނެ ކަމަށް ވެސް މައުލޫމާތު ލިބެއެވެ. އަދި މި ފިލްމުގެ މަންޒަރުތައް ނެގުމަށް ހަމަޖެހިފައިވަނީ އިންޑިއާ އަދި ބައެއް އެހެން ގައުމުތަކުގައެވެ.
މި ފިލްމުގެ ފައިނަލް ސްކްރިޕްޓް ނިމުމަށްފަހު ލަވް މި ފިލްމަށް ބޭނުންވާ އެކްޝަން ޑައިރެކްޓަރުން އިންޑިއާ އަދި އިންޓަނޭޝަނަލް މީހުން ހިމެނޭ ޓީމެއް ގާއިމްކުރާނެއެވެ. މި ފިލްމަކީ ވަރަށް ބޮޑު ބަޖެޓެއް ކަނޑައެޅިގެން ކުރިޔަށް ދާނެ ފިލްމެކެވެ. މި ފިލްމުގެ އަންހެން ރޯލުތަކަށް ތަރިން ނެގުމުގެ މަސައްކަތް މިހާރު ކުރަމުން އަންނަ ކަމަށް ވެސް ރިޕޯޓްތައް ބުނެއެވެ.
މި ފިލްމު ރިލީޒް ކުރުމަށް ނިންމާފައިވަނީ 2020 ވަނަ އަހަރުގެ ޑިސެމްބަރުމަހުގެ 25 ހިސާބުގައެވެ.