އިންޑިޔާ އާންމު އިންތިޚާބަށް ކުޑަ ދުވަސްކޮޅަކަށް ވެފައިވާއިރު ވޯޓު ގަނެ ވިއްކުމުގެ ސިލްސިލާ ފެށިގެން ކުރިއަށް އެބަ ދާ ކަމަށް އެ ގައުމުގެ އިލެކްޝަންސް ކޮމިޝަނުން ހާމަކޮށްފިއެވެ. މިހާތަނަށް ހިންގުނު ތަހުގީގުތަކުގައި 80 މިލިއަން ޑޮލަރު، ނަގުދު ފައިސާއާއި އެހެނިހެން މުދަލުގެ ގޮތުގައި ބަހަނިކޮށް ވަނީ އަތުލާފައެވެ.
އިންޑިޔާ އިލެކްޝަން ކޮމިޝަނާ ހަވާލާދީ ބީބީސީ އިން ރިޕޯޓުކޮށްފައިވާ ގޮތުގައި ވޯޓު ގަތުމަށް އާންމުންނަށް ނަގުދު ފައިސާގެ ގޮތުގައި ބަހާފައިވާ 22 މިލިއަން ޑޮލަރު އަތުލާފައިވާ ކަމަށެވެ. އަދި ބަނގުރަލުގެ ގޮތުގައި 13.5 މިލިއަން ޑޮލަރު، މަސްތުވާތަކެތީގެ ގޮތުގައި 19.2 މިިލިއަން ޑޮލަރުގެ މަސްތުވާތަކެތި ވެސް ވަނީ އަތުލައިގެންފައެވެ.
ބީބީސީ އިން ރިޕޯޓުކޮށްފައިވާ ގޮތުގައި އިންޑިޔާގައި ފައިސާ އާއި މުދާ ބަހައިގެން އިންތިޚާބުތަކަށް މާބޮޑު އަސަރެއް މީގެ ކުރިންވެސް ކޮށްފައެއް ނުވެއެވެ. ނަމަވެސް ސިޔާސީ ފަރާތްތަކުން އެހެން އިންތިޚާބުތަކާ އެއްގޮތަށް މިފަހަރުވެސް ލާރި ބަހައި ވޯޓު ގަނުމުގެ މަސައްކަތް އަންނަނީ ކުރަމުންނެވެ.
އެކަން ހުއްޓުވުމަށް ފުލުހުން ޚާއްސަ އޮޕަރޭޝަނެއް ފަށާފައިވާއިރު ކާރު ސައިކަލު ކުރިން އެންގުމެއް ނެތި ހުއްޓުވައި ބަލަމުން އަންނަ ކަމަށް މީޑިޔާ ރިޕޯޓުތައް ބުނެއެވެ.
އެންމެ ގިނަ އަދަދަކަށް ފައިސާއާއި މުދަލާ ރާ ބަހަމުން ދަނީ އިންޑިޔާގެ ފަގީރު ސަރަހައްދުތަކަށެވެ. އެގޮތުން އަންދްރަ ޕްރަދޭޝް އިން ވޯޓު ވިއްކައިގެން ހޯދި ގިނަ އަދަދެއްގެ ފައިސާއާއި މުދަލާ ރާ ހޯދިފައިވާ ކަމަށް ފުލުހުން ބުނެއެވެ.