އެމްޑީޕީގެ އެޖެންޑާ 19 ކެމްޕޭނު ހަރަކާތަކަށް ރައީސް އިބްރާހިމް މުހައްމަދު ސޯލިހް މިއަދު އައްޑޫ ސިޓީއަށް ވަޑައިގަތުމަށް ހަމަޖެހިއްޖެއެވެ.
އެމްޑީޕީން މައުލޫމާތުދޭ ގޮތުގައި ރައީސް އައްޑުއަށް ވަޑައިގަންނަވަނީ ފޭދޫ ދާއިރާގެ އެމްޑީޕީ ކެންޑިޑޭޓް އަހުމަދު ނިހާދުގެ ކެމްޕޭނު ހަރަކާތެއްގައި ބައިވެރިވެވަޑައިގެންނެވުމަށެވެ. އެމަނިކުފާނު އައްޑުއަށް ވަޑައިގަތުމަށް ހަމަޖެހިފައިވަނީ މިއަދު މެންދުރު ފަހުގެ ވަގުތެއްގައި ކަމަށް މައުލޫމާތު ލިބިފައިވެއެވެ.
ނިހާދުގެ ކެމްޕޭނު ޓީމުން އިންތިޒާމް ކުރާ ފުޓުބޯޅަ މެޗެއް ޝަރަފުވެރިކޮށް ދެއްވުމަށް ފަހު ރައީސް އައްޑޫގެ ބައެއް ސަޕޯޓަރުންނާ ބައްދަލުކުރައްވައި މިރޭ އެނބުރި މާލެ ފުރާވަޑައިގަންނަވާނެއެވެ.
ރައީސް މިއަދު އައްޑުއަށް ވަޑައިގަންނަވާއިރު އެމްޑީޕީގެ ރައީސް އަދި މައްޗަނގޮޅި މެދު ދާއިރާގެ ކެންޑިޑޭޓް މުހައްމަދު ނަޝީދު ވަނީ ފުވައްމުލަކާއި ތިނަދުއަށް ކުރައްވާ ދަތުރުފުޅެއްގައި މިއަދު ފުވައްމުލަކު ސިޓީއަށް ވަޑައިގެންފައެވެ.
އެމްޑީޕީން ބުނެފައިވަނީ ރައީސް ސޯލިހުގެ ކެމްޕޭނު ދަތުރުފުޅުތަކުގެ ހުރިހާ އިންތިޒާމަކާއި ޚަރަދެއް ބަލަހައްޓާނީ އެޕާޓީން ކަމަށެވެ.