ރައްޔިތުންގެ މަޖިލީހުގެ ރައީސް ގާސިމް އިބްރާހިމް މަގާމުގެ ނުފޫޒުު ނަހަމަ ގޮތުގައި ބޭނުންކުރަމުންދާ ކަމަށް ތުހުމަތުކޮށް، އެމްޑީޕީ މެމްބަރުން އެމަނިކުފާނަށް ވަރަށް ބޮޑަށް ފާޑުވިދާޅުވެއްޖެއެވެ.
އެމްޑީޕީއާއި ޖުމުހޫރީ ޕާޓީއާ ދެމެދު އުފެދިފައިވާ ކޯޅުންގަނޑު އިތުރަށް ބޮޑުވެފައިވަނީ މިއަދުގެ މަޖިލީހުގެ ޖަލްސާގައި، ވަޒީރުންނާއި ފަނޑިޔާރުންނާއި މިނިވަން މުއައްސަސާތަކުގެ މެމްބަރުންގެ މައްޗަށް އިތުބާރު ނެތް ކަމުގެ ވޯޓު ނެގުމާ ގުޅޭ އުސޫލެއް އާންމު ކޮމިޓީން ފާސްކޮށްފައިވާތީ، އެކަމާ މެދު ސުޕްރީމް ކޯޓުގެ އިސްތިޝާރީ ލަފައެއް ހޯދުމާ މެދު މަޖިލިހުން ގޮތެއް ނިންމަން ހުށަހެޅުމުންނެވެ.
އެކަމާ ދެކޮޅަށް ވާހަކަ ދައްކައި އެންމެ ބޮޑަށް ފާޑުވިދާޅުވީ ގަލޮޅު އުތުރު ދާއިރާގެ މެމްބަރު އީވާ އަބްދުﷲ އެވެ. އީވާ ވަނީ ސުޕްރީމް ކޯޓުގެ އިސްތިޝާރީ ލަފަޔަކަށް މިފަދަ މައްސަލައެއް، މަޖިލީހުގެ ރުހުން ހޯދުމެއް ނެތި ހުށައެޅުމުގެ ގާނުނީ އެއްވެސް ހުއްޖަތެއް ނެތް ކަމަށާއި، ގާސިމް އިބްރާހިމް ކުރައްވަން އުޅުއްވާ ކަމަކީ ސުޕްރީމް ކޯޓުގައި ތިއްބެވި އެމަނިކުފާނުގެ ފަސް "އެކުވެރިން" ލައްވާ މަޖިލީހާއި ރައީސުލް ޖުމުހޫރިއްޔާގެ ބާރު ކަނޑުވާލަން ކަމަށް ތުހުމަތު ކުރައްވާފައެވެ.
ހިތަދޫ މެދު ދާއިރާގެ މެމްބަރު އިބްރާހިމް މުހައްމަދު ދީދީ ވެސް ވަނީ ސުޕްރީމް ކޯޓުގެ އިސްތިޝާރީ ލަފަޔަކަށް އެހުމާ ދެކޮޅަށް އަޑު އުފުލާފައެވެ. ނުރުހުން ފާޅު ކުރައްވަމުން ޑީޑީ ވިދާޅުވީ، ގާސިމް އިބްރާހިމް މަޖިލީހުގެ ރައީސްގެ މަގާމުގައި ހުންނަވައި މިހާރު މަސައްކަތް ކުރައްވަމުން ގެންދަވަނީ ބަޣާވާތެއް ގެނައުމަށް ކަމަށެވެ.
އަދި ދިވެހި ދައުލަތް ހިސޯރު ކުރަން އެމަނިކުފާނު ކުރައްވާ މަސައްކަތް ކުރެވުނަ އެމްޑީޕީ މެމްބަރުން ނުދެއްވާނެ ކަމަށް ވެސް ޑީޑީ ވިދާޅުވިއެވެ.
މީގެ އިތުރުން ކޮމަންޑޫ ދާއިރާގެ މެމްބަރު އަހުމަދު ނަޝީދު(އޭޑީކޭ ނާޝިދު) އަދި ކުޅުދުއްފުށީ އުތުރު ދާއިރާގެ މެމްބަރު އަބްދުލްޣަފޫރު މޫސާ ވެސް ވަނީ ގާސިމަށް ފާޑުވިދާޅުވެފައެވެ. ނާޝިދު ވިދާޅުވީ، ގަވާއިދަށް ގެނައި ބަދަލަކުން ސުޕްރީމް ކޯޓުގެ ލަފަޔަކަށް އަހަން ޖެހޭ ސަބަބެއް އޮތް ކަމަށް ގަބޫލު ނުކުރެވޭ ކަމަށާއި، އެގޮތަށް އަމަލު ކުރާ ނަމަ މަޖިލީހުގެ ހައިބަތާއި ގަދަރު ގެއްލިގެންދާނެ ކަމަށް ގަބޫލުކުރެވޭ ކަމަށެވެ.
ޣަފޫރު ވަނީ ސިޔާސީ ކޯޅުމެއްގެ ތެރޭގައި ލައްކަ ދުވަހު މިރާއްޖެ ބޭވިއްޖެ ކަމަށާއި އެކަން ދެން ނުކުރެވޭނެ ކަމަށް ވިދާޅުވެފައެވެ. އަދި ސިޔާސީ މަންފާ ހާސިލު ކުރުމަށް ބާއްވާފައި އޮންނަ ތަނެއްގެ ގޮތުގައި ރައްޔިތުންގެ މަޖިލިސް ހެދުމަށް ފުރުސަތު ނުދެވޭނެ ކަމަށްވެސް އޭނާ ވިދާޅުވިއެވެ.