ހުޅުމީދޫ ބޮޑު މަގު (ބަހާއުއްދީން މަގު) ހެދުމުގެ މަޝްރޫއުގެ އެއްބަސްވުމުގައި އެމްޓީސީސީއާއެކު ސަރުކާރުން ސޮއިކޮށްފިއެވެ.
ސަރުކާރުން މިއަދުވަނީ ހުޅުމީދޫ ބޮޑު މަގުގެ އިތުރު ދެ ޕްރޮޖެކެޓެއްގައި އެމްޓީސީސީ އާއި އެކު ސޮއިކޮށްފައެވެ. އެއީ ފުވައްމުލަކު ރިންގު ރޯޑުގެ މަސައްކަތާއި ގއ. ކަނޑުހުޅުދޫ ކަނޑު ތޮށީގެ މަސައްކަތެވެ.
މިއަދު ވެވުނު ތިން އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ޕްލޭނިން މިނިސްޓްރީގެ ޕާމަނަންޓް ސެކްރެޓަރީ ޒީނިޔާ އަހުމަދު ހަމީދެވެ. އެމްޓީސީސީގެ ފަރާތުން ސޮއިކުރެއްވީ އެކުންފުނީގެ ސީއީއޯ ހަސަން ޝާހެވެ.
ހުޅުމީދޫ ބަހާއުއްދީން މަގު ހެދުމަށް އެމްޓީސީސީ އާއި ހަވާލުކޮށްފައިވަނީ 32،719،385،70 ރުފިޔާއެވެ. މި މަސައްކަތް 240 ދުވަސް ތެރޭގައި ނިންމަންޖެހޭނެ ކަމަށް އެއްބަސްވުމުގައި ވެއެވެ.
މި މަޝްރޫއުގެ ދަށުން ހުޅުމީދޫ ބަހާއުއްދީނު މަގުގެ 2.02 ސަރަހައްދެއް ރަނގަޅު ފެންވަރަކަށް ހަދައި، މަގުގައި ތާރުއެޅުމަށް ވަނީ ނިންމައިފައެވެ. އަދި މަގުބައްތި ޖެހުމާއި ސައިޑްވޯކް ގާއިމްކުރުމަށް އެއްބަސްވުމުގައި ވެއެވެ.
މިއަދު އެއްބަސްވެވުނު ދެވަނަ އެއްބަސްވުމުގައި ހިމެނޭ ފުވައްމުލަކު ރިންގު ރޯޑު މަޝްރޫއުގެ އަގަކީ 32،042،893،70 ރުފިޔާއެވެ. މިމަސައްކަތް 240 ދުވަސް ތެރޭގައި ނިންމަންޖެހޭ އިރު މި މަޝްރޫއުގެ ދަށުން ފުވައްމުލަކު ރިންގްރޯޑުގެ 2.7 ކިލޯ މީޓަރުގެ ސަރަހައްދެއް ރަގަޅު ފެންވަރަކަށް ހަދައި، މަަގު ބައްތި ޖެހުމަށް ވަނީ ނިންމައި ފައެވެ.