ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފުރަތަމަ 100 ދުވަހުގެ ތެރޭގައި ހިމެނޭ ކަރަޕްޝަނާއި ގުޅުން ހުރި ވައުދުތަކުގެ 100 ޕަސެންޓު ފުރިހަމަ ކުރެވިފައިވާކަމަށް ރައީސް އޮފީހުން ބުނެފިއެވެ.
ރައީސް ސޯލިހުގެ ސަރުކާރުން ކަރަޕްޝަނާއި ގުޅުން ހުރި 10 ވައުދެއް ފުއްދަން ކަނޑައެޅިއެވެ. އެއީ:
* ދަޢުލަތުގެ މުދަލާއި ފައިސާއަށް ވެފައިވާ ޚިޔާނާތާއި މަނީލޯންޑްރިންގ މައްސަލަތައް ބެލުމަށް ކޮމިޓީއެއް އުފައްދާ އެކަން ހޯދާ ބަލަން ފެށުން.
* ސަރުކާރުގެ އިދާރާތަކާއި ދަޢުލަތުގެ ކުންފުނިތަކަށް މިނިވަން މުޢައްސަސާތަކަށް ޢައްޔަންކުރާ ހުރިހާ ފަރާތްތަކާއި އެމީހުންގެ އަނބި/ފިރިންގެ މުދަލާއި މާލީބަޔާން ހާމަކޮށް ޤަވާޢިދުން ރިވިއުކުރުން
* ޢާންމުންނަށް ޚިޔާލުހުށަހެޅުމާއި ކޮރަޕްޝަނާއި ގުޅޭ މައްސަލަތައް ފަސޭހައިން ހުށަހެޅޭނެ ޕްލެޓްފޯމެއް ޤާއިމްކުރުން
* ޒީރޯ ޓޮލަރަންސް ޓު ކޮރަޕްޝަން ކެމްޕެއިން ފެށުން
* ހުރިހާ އިންތިޚާބީ އަދި އައްޔަންކުރެވޭ މަޤާމުތަކަށް ވަޑައިގަންނަވާ ފަރާތްތަކަށް އެންޓިކޮރަޕްޝަން އަދި ގުޑްގަވަރނަންސް އާގުޅޭ ޕްރޮގްރާމެއް ހިންގުން
* ވިސްލް ބްލޮވިންގް ޤާނޫނު ރައްޔިތުންގެ މަޖިލިހަށް ފޮނުވުން
* ނުހައްޤުން މުއްސަނދިވުން ހުއްޓުވުމަށް ޤާނޫނެއް މަޖިލިހަށް ހުށައެޅުން
* ރިޝްވަތު ހިފާ މީހާއާއި އެއްވަރަށް ރިޝްވަތުދޭ މީހާ ވެސް ކުށްވެރިވާގޮތަށް އެންޓިކޮރަޕްޝަން ޤާނޫނަށް ބަދަލު ގެނައުން
* މިނިވަން މުޢައްސަސާތައް މިނިވަން ކަމާއެކު ހިންގޭނެ ގޮތަށް ޤާނޫނުތައް އިސްލާޙުކުރަން މަޖިލިހަށް ހުށަހެޅުން
* ބިދޭސީންނަށް ކޯޓާ ދޫކުރުމާއި އެ މީހުންނާ ގުޅޭ ކަންކަމުގައި ރިޝްވަތު ނެގުން ހުއްޓުމަކަށް ގެނައުމަށްޓަކައި އަޅަންޖެހޭ ފިޔަވަޅުތައް އަޅަން ފެށުން