އަންނަ ހަފުތާ ހޮނިހިރު ދުވަހު ބޭއްވޭ ރައްޔިތުންގެ މަޖިލީހުގެ އިންތިޚާބުގައި ދިވެހި ރައްޔިތުން ވޯޓު ދޭންވީ ހެޔޮ ވެރިކަމެއް ގާއިމް ކުރުމަށް ކޯލިޝަންގެ ކެންޑިޑޭޓުންނަށް ކަމަށް މޯލްޑިވްސް ރިފޯމް މޫވްމަންޓްގެ ލީޑަރ އަދި ކުރީގެ ރައީސް މައުމޫން އަބްދުލްޤައްޔޫމް އެމަނިކުފާނުގެ ސަޕޯޓަރުންގެ ކިބައިން އެދިވަޑައިގެންފިއެވެ.
ރޭ މާލޭގައި މައްޗަނގޮޅި އުތުރު ދާއިރާއަށް ވާދަކުރާ އެމަނިކުފާނުގެ ދަރިކަލުން އަހުމަދު ފާރިސް މައުމޫންގެ ކެމްޕޭން ޖަލްސާގައި ވާހަކަ ދައްކަވަމުން މައުމޫން ވިދާޅުވީ، އިއްތިހާދުގެ ސަޕޯޓަރުން ވޯޓު ދޭއިރު ކޯލިޝަންގެ ކެންޑިޑޭޓުންނަށް ވޯޓު ދެއްވުމަށާއި، ކޯލިޝަނަށް އަޣުލަބިއްޔަތު ނުލިބިއްޖެނަމަ ފާއިތުވެދިޔަ ހިތާމަވެރި ދުވަސްތައް އިއާދަ ވެދާނެ ކަމަށެވެ.
މީގެ އިތުރުން ކޯލިޝަންގެ ކޮންމެ ކެންޑިޑޭޓަކަށް ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހްގެ ތާއީދު އޮންނަވާނެ ކަމަށާއި، އެމަނިކުފާނަކީ ވަކި ޕާޓީއެއްގެ ރައިސެއް ނޫން ކަމަށް، އަދި އެމަނިކުފާނަކީ ހަމަ ކޯލިޝަނުގެ ރައީސް ކަމަށް ވެސް މައުމޫން ވިދާޅުވިއެވެ.
މައުމޫން މިހެން ވިދާޅުވެފައިވަނީ، އެމްޑީޕީގެ ކެމްޕޭނު ހަރަކާތެއްގައި ކުރީގެ ރައީސް މުހައްމަދު ނަޝީދު، އެމްޑީޕީ ނޫން އެހެން އެއްވެސް ޕާޓީއެއްގެ ކެންޑިޑޭޓަކަށް ރައީސްގެ ތާއީދު ނޯންނާނެ ކަމަށް ވިދާޅުވުމުން އެކަމަށް ރައްދު ދެއްވަމުންނެވެ.
މައުމޫންގެ ވަނީ ރޭގެ ޖަލްސާގައި ނުސީދާގޮތުން ގާސިމް އިބްރާހިމަށް ވެސް ރައްދު ދެއްވާފައެވެ. ޕީޕީއެމާއެކު ކޯލިޝަން ހަދައި ޕީޕީއެމް ކެންޑިޑޭޓުންނަށް ބައިއަތު ހިފާފައިވަނިކޮށް މައުމޫން ވަނީ ކޯލިޝަނުގައި ނުހިމެނޭ ޕާޓީތަކުގެ ކެންޑިޑޭޓުންނަށް ވޯޓު ނުދިނުމަށް ސަޕޯޓަރުންގެ ކިބައިން އެދިވަޑައިގެންފައެވެ.