ރައްޔިތުންގެ މަޖިލީހުގެ އިންތިޚާބުގައި ބޭނުންކުރާ ވޯޓު ފޮށިތަކާއި ވޯޓު ކަރުދާސް ވޯޓުލާ މަރުކަޒުތަކަށް ފޮނުވުމުގެ މަސައްކަތް އިލެކްޝަންސް ކަމިޝަން(އީސީ)އިން ފަށައިފިއެވެ.
ހުކުރު ދުވަހުން ފެށިގެން ވޯޓު ފޮށިތަކާއި ވޯޓު ކަރުދާސް އަދި ވޯޓުލުމަށް ބޭނުންވާ ތަކެތި ރަށްރަށަށް ފޮނުވަން ފަށާފައިވާ ކަމަށް އީސީ އިން ބުނެއެވެ.
އީސީއިން ބުނީ ވޯޓުފޮށިތަކާއި ކަރުދާސް ފޮނުވަމުންގެންދަނީ އެކަމިޝަނުގެ އޮފިޝަލަކާއި ފުލުހެއްގެ ހަވާލުގައި ކަމަށާއި އަދި އަންނަ މަހުގެ 2 ވަނަ ދުވަހުގެ ނިޔަލަށް ހުރިހާ ރަށަކަށް ވޯޓުލުމަށް ބޭނުންވާ ސާމާނު ފޮނުވައި ނިމޭނެ ކަމަށް އެ އިދާރާ އިން ބުނެފައިވެއެވެ.
މިފަހަރުގެ ރައްޔިތުންގެ މަޖިލީހުގެ އިންތިޚާބުގައި ރާއްޖެއާއި ރާއްޖެއިން ބޭރުގައި ޖުމްލަ 501 ވޯޓު ފޮށި އީސީއިން ބަހައްޓަން ނިއްމާފައިވާއިރު
މި އިންތިޚާބުގައި 36 އިންޓަނޭޝަނަލް އޮބްޒާވަރުން ހަރަކާތްތެރިވާނެ އެވެ.
އަންނަ އެޕްރީލް މަހުގެ 6 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިޚާބުގައި 264،589 މީހުންނަށް ވޯޓުލުމުގެ ހައްގު ލިބިފައިވާއިރު 386 ކެންޑިޑޭޓުން 87 ދާއިރާއަކަށް ވާދަކުރެއެވެ.