ކުރީގެ ރައީސް މައުމޫން އަބްދުލްޤައްޔޫމްގެ ދަރިކަލުން، އަހުމަދު ފާރިސް މައުމޫންގެ ކެމްޕޭނު ޖަލްސާގައި ރޭ، ނައިބު ރައީސް ފައިސަލް ނަސީމާއި ރައީސްގެ ގިނަ އަދަދެއްގެ ވަޒީރުން ބައިވެރިވެވަޑައިގެންނެވީތީ ރައީސް ސޯލިހަށް މައުމޫން ޝުކުރު އަދާ ކުރައްވައިފިއެވެ.
މައުމޫން މިއަދު ކުރެއްވި ޓުވީޓެއްގައި އެމަނިކުފާނު ވަނީ އެމްއާރްއެމަށް ރައީސް ކުރައްވާ ތާއީދާއި ދެއްވާ ސަޕޯޓަށް ޝުކުރު އަދާކުރައްވައި، ރައީސް ސޯލިހުގެ ފަހަތްޕުޅުގައި މައުމޫނާއި ޕާޓީ އޮތް ކަން ހާމަ ކުރައްވާފައެވެ.
ރޭގެ ޖަލްސާ ޝަރަފުވެރިކޮށްދެއްވީ ނައިބު ރައީސް ފައިސަލްއެވެ. ނައިބު ރައީސްގެ އިތުރުން ޓްރާންސްޕޯޓް މިނިސްޓަރ އައިޝާއާއި އެހެނިހެން ވަޒީރުން ޖަލްސާގައި ބައިވެރިވެވަޑައިގެން ފާރިސްއަށް ތާއީދުކޮށް ވާހަކަ ދައްކަވާފައިވެއެވެ.
ޖުމުހޫރީ ޕާޓީގެ ކައުންސިލް މެމްބަރު އަދި މިނިސްޓަރު އައިޝާގެ ވާހަކަފުޅުގައި ފާރިސް އަކީ ރައުސުލްމާލެއް ކަމަށް ވިދާޅުވެ، އޭނާއަށް ވޯޓު ދެއްވުމަށް ސަޕޯޓަރުންގެ ކިބައިން އެދިވަޑައިގެންފައިވެއެވެ.
މައްޗަނގޮޅި އުތުރު ދާއިރާއަށް ވާދަކުރާ ކެންޑިޑޭޓުންގެ ތެރޭގައި އެމްޑީޕީގެ ކެންޑިޑޭޓު މުހައްމަދު ރަޝީދު(ބޯދިގު) ވެސް އަންނަނީ ބާރަށް ކެމްޕޭނު ކުރައްވަމުންނެވެ.
ރައީސް ސޯލިހު ވަނީ ދާދި ފަހުން، ކޯލިޝަންގެ ކެންޑިޑޭޓުންނަކީ ސަރުކާރު ކެންޑިޑޭޓުން ކަމަށް ވިދާޅުވެފައެވެ.