ބިދޭސީންގެ ކޯޓާ އާއި ގުޅޭ ހިދްމަތްތައް އިންގްރޭޝަނުން އިކޮނޮމިކް މިނިސްޓްރީއަށް ބަދަލު ކުރުމާއި ގުޅިގެން އައްޑޫން މީގެ ކުރިން އިމިގްރޭޝަންއިން ދެމުން ދިޔަ ހިދްމަތް ހުއްޓާލުމާއި ގުޅިގެން އެ ހިދްމަތް ނުލިބިގެން އާއްމުން ޝަކުވާ ކުރަން ފަށައިފިއެވެ.
"އައްޑޫލައިވް"އަށް އެނގިފައިވާ ގޮތުގައި މިވަގުތު އައްޑޫގެ އެއްވެސް މުވައްސަސާއަކުން ބިދޭސީންނާއި ގުޅޭ އެއްވެސް ހިދްމަތެއް ނުލިބެއެވެ.
ބިދޭސީންގެ ކޯޓާ އާއި ގުޅޭ މަސައްކަތް މީގެ ކުރިން ދެމުން ދިޔައީ ހިތަދޫގައި ހުންނަ އިމިގްރޭޝަން އޮފީހުންނެވެ. އަދި މި މަސައްކަތް އިކޮނޮމިކް މިނިސްޓްރީއަށް ބަދަލުކުރުމުން އިމިގްރޭޝަނުން ވަނީ ހިދްމަތް ހުއްޓާލާފައެވެ.
ކޮންސްޓްރަކްޝަން މަސައްކަތް ކުރާ ހިތަދޫގެ ކުންފުންޏަކުން ބުނީ ބިދޭސީ ކޯޓާއި އާއި ގުޅޭ އެއްވެސް ހިދްމަތެއް އައްޑޫން މިހާރު ނުލިބޭއިރު އެ ހިދްމަތް ހޯދަން ދާންވީ ތަނެއްވެސް ނޭގޭ ކަމަށެވެ.
"އިމިގްރޭޝަން ކައުންޓަރަށް ދިޔައީމާ މި ބުނަނީ އިކޮނޮމިކް މިނިސްޓްރީއަށް ދާށޭ، އެތަނަށް ދިޔައީމާ މިބުނަނީ އަދި ތި ހިދްމަތެއް ދޭން ނުފަށައޭ، ދެން ކިހިނެއް މިކަން ކުރާނީ"
އެމީހާ ބުނީ މިހާރު ދެން ޖެހެނީ މި ހިދްމަތް ހޯދަން ދާން ކަަމަށެވެ.
"މިއީތޯ އެބުނާ ލާމަރުކަޒީ ކުރުމަކީ، މީގެ ކުރިން ލިބުނު ހިދްމަތް މިހާރު އައްޑޫން ނުލިބޭ، މީގެ ކުރިން އިކޮނޮމިކް މިނިސްޓްރީ އައްޑޫ އޮފީހުން ކުންފުނި ހަފްތާއެެއްގެ ތެރޭ ރަޖިސްޓްރީ ކުރެވޭ، ފަރުދުންގެ ވިޔަފާރި ރަޖިސްޓްރީ އެއްދުވަހުން ލިބޭ، މިހާރު ތިން މަސް އެބަ ނަގާ، މިއީ ރައްޔިތުން އެދޭ ގޮތެއް ނޫން"
މާލެ ފިޔަވައި އެންމެ ގިނަ ބިދޭސީން އުޅޭ އެއް ސަރަހައްދަކީ އައްޑޫއެވެ. އައްޑޫން ބިދޭސީންނާއި ގުޅޭ ކަންކަން ފުރިހަމަ ނުކުރެވުމަކީ ގިނަ ބައެއްގެ ކަންބޮޑުވުމެކެވެ.