މޯލްޑިވްސް ލޯ އިންސްޓިޓިއުޓުން ހުޅުމީދޫގައި ގާއިމްކޮށްފައިވާ ލޯ ކޮލެޖްގެ ކިޔެވުން މިމަހު 16 ގައި ފަށާނެ ކަމަށް އެ ކޮލެޖުން ބުނެފި އެވެ.
ކުރިން ހަމަޖައްސާފައި އޮތީ މިދިޔަ މަހުގެ 21 ވަނަ ދުވަހު އެތަނުގެ ކިޔެވުން ފަށާ ގޮތަށެވެ.
ވިލާ ކޮލެޖާ ގުޅިގެން ކުރިއަށް ގެންދާ ލޯ ކޮލެޖްގެ ކިޔެވުން ފެށުމަށް ހަމަޖެހިފައިވާ އިރު މިހާރު ހަމަ އެކަނި ނުނިމި ހުރީ ކަރަންޓްގެ މަސައްކަތް ކަމަށް ވެ އެވެ.
ލޯ ކޮލެޖްގެ އޮފިޝަލަކު މިއަދު ވިދާޅުވީ ކަރަންޓްގެ މަސައްކަތް މިމަހުގެ 13 އާއި ހިސާބަށް ނިންމާލެވޭނެ ކަމަށް އުންމީދޫ ކުރާ ކަމަށެވެ. އަދި ކަރަންޓްގެ ކަންތައް ނިމުމާއި އެކު ކޮލްޖަށް ވަނުމުގެ ރެޖިސްޓްރޭޝަން ކުރިއަށް ގެންދާނެ ކަމަށެވެ.
"މި ބަލަނީ 13، 14، ގައި ރަޖިސްޓްރޭޝަން ކުރިއަށް ގެންދަން، އަދި 15 ވަނަ ދުވަހު އޮރިއެންޓޭޝަން ބާއްވާން." އޮފިޝަލް ވިދާޅުވި އެވެ.
މޯލްޑިވްސް ލޯ ކޮލެޖުން ހުޅުވާލި ފުރުސަތުގައި 39 ފަރާތަކުން ކޮލެޖްގައި ކިޔެވުމަށް ފޯމު ހުށަހަޅާފައި ވެ އެވެ.އަދި އިތުރު ފޯމްތައް އަދި ލިބޭނެ ކަމަށް އޮފިޝަލް ވިދާޅުވި އެވެ.
އޮފިޝަލް ވިދާޅުވީ މިހާތަނަށް ހިތަދޫގެ 6 ކުއްޖަކާއި ފުވައްމުލަކާއި ރާއްޖޭގެ އުތުރުންވެސް ލޯ ކޮލެޖްގައި ކިޔެވުމަށް އެދި ހުށަހަޅާފައިވާ ކަމަށެވެ.
"އަޅުގަނޑުމެންނަށް ފޯމް ހުށަހަޅާފައި އެބަތިބި ހިތަދޫ، ފުވައްމުލައް އަދި އުތުރުގެ ކުދިން އެކަމަކު ގިނައީ ހުޅުމީދޫ ކުދިން." އޮފޝަލް ވިދާޅުވި އެވެ.
އެސްޓީއޯ އިން ހުޅުމީދޫގައި އިމާރާތްކޮށްފައިވާ ހަތަރު ބުރީގެ އިމާރާތުގައި ކުރިއަށްދާ ލޯ ކޮލެޖްގައި ފުރަތަމަ ފެށުމަށް ހަމަޖެހިފައި ވަނީ ފައުންޑޭޝަން ކޯހަކާއި ސެޓްފިކެޓް ލެވެލް 3 ގެ ކޯހެކެވެ.