ޓައިވާނުގެ އުތުރުގައި އޮންނަ ކުޑަކުޑަ އަވަށެއް ކަމަށްވާ ހޮއުޓޮންގ އަކީ އިންސާނުންގެ އާބާދީ ކުޑަ ނަމަވެސް ބުޅަލުގެ އާބާދީ ވަރަށް ބޮޑު އަވަށެކެވެ. އެއަވަށް ދާކޮންމެ މީހަކަށްވެސް ފާހަގަ ކުރެވޭނީ އެއަވަށުގެ ހަޤީޤީ އަހުލުވެރިންނަކީ ބުޅާކަމެވެ.
1900ގެ ކުރީކޮޅު މި އަވަށަކީ މުޅި ޓައިވާނުގައިވެސް ކޯލް މައިންކުރުމުގައި އެންމެ ޓެކްނޮލޮޖީގެ ގޮތުން ކުރިއަރާފައިއޮތް އަވަށެވެ. 6000 ވަރަކަށް މީހުންގެ އާބާދީއެއްއޮތް ހޮއުޓޮންގގެ ކޯލް މައިންކުރުމުގެ މަސައްކަތް ހުއްޓިގެން ދިޔައީ 1990ގެ ތެރޭގައި މައިންގެ މަސައްކަތް ހުއްޓުމުންނެވެ. ވަޒީފާ ހޯދުމަށްޓަކާ އަވަށުގެ މީހުން އެކި ހިސާބުތަކަށް ހިޖުރަކުރުމުގެ ސަބަބުން އެއަވަށުގެ އާބާދީ މާގިނަ ދުވަސްތަކެއްނުވެ 100އަށް ވެއްޓުނެވެ.
ނަމަވެސް، 2010ވަނަ އަހަރު ވެގެންދިޔައީ އެއަވަށަށް އާފެށުމެއް ގެނުވި އަހަރަކަށެވެ. ބުޅާދެކެ ލޯބިވާ ފޮޓޯނަގާމީހަކު އެއަވަށުގައި ގިނަވަމުންދިޔަ ބުޅާތަކުގެ ފޮޓޯނަގައި ބްލޮގް ކުރަންފެށި ހިސާބުުން އެއަވަށް ބުޅާދެކެ ލޯބިވާ މީހުންގެ މައި ހަބަކަށް ބަދަލުވެގެން ދިޔައެވެ. އަދި ރަށުގައި ދިރިއުޅެމުންދިޔަ މީހުންނަށްވެސް އާމްދަނީ ހޯދޭނެ މަގެއް ފަހިވެގެން ދިޔައެވެ.
އެއަވަށުގެ ބުޅާތަކުގެ ސަބަބުން ލިބުނު މަޝްހޫރުކަމުގެ ބޭނުން ހިފައިގެން އެއަވަށުގެ ސަރުކާރުން މިހާރު ވަނީ އެއަވަށް ފަތުރުވެރި އަވަށަކަށް ހަދާފައެވެ. ބުޅާ ތީމްގެ ފިހާރަތަކާއި ކެފޭތަކުގެ އިތުރުން ހިނގާބިނގާވެ އުޅޭ މީހުންނަށް ޚާއްސަ ބުޅާ ބްރިޖެއްވެސް ވަނީ ހަދާފައެވެ. އަދި މިފުރުސަތުގެ ބޭނުންކޮށްގެން އެއަވަށުގެ ތާރީޚުވެސް ދައްކާލަން މިއުޒިއަމް ޕާކެއް ހަދާފައެވެ. މިޕާކުން 2012ވަނަ އަހަރުވަނީ ބުޅާ ލެންޓަރން ފެސްޓިވަލެއް ބާއްވާފައެވެ.
އެއަވަށުގެ ބުޅާތައް ބެލެހެއްޓުމުގެ މަސައްކަތްކުރަނީ އެވަށުގެ ރައްޔިތުންނާއި ވޮލަންޓިއަރ ގުރޫޕެކެވެ. މިގޮތުން ބުޅާތަކަށް ކެވޭނެހެން މަގުގެ އެއްފަޅީގައި ކާނާ ބަހައްޓާފައިހުރެއެވެ. އަދި ބުޅާތަކަށް ވެކްސިން ދިނުމާއި ބޭސްފަރުވާކުރުމުގެ މަސައްކަތްވެސް އެއަވަށުން ބަލަހައްޓައެވެ. މީގެ އިތުރުން އެއަވަށުން ބުޅަލުގެ ބޯހިމެނުންވެސް ކުރިއަށްގެންދެއެވެ. 2019 ވަނަ އަހަރުގެ ބޯހިމެނުން ދައްކާގޮތުން މީގެ ދެއަހަރު ކުރިއާ އަޅާބަލާއިރު އެއަވަށުގައި 50 ބުޅާ އިތުރުވެ، ބުޅަލުގެ އާބާދީވަނީ 286އަށް އަރާފައެވެ.
އަންދާޒާ ކުރެވޭގޮތުގައި އަހަރެއްގެ މައްޗަށް ބުޅާ ބެލުމަށް އެއަވަށަށް ޒިޔާރަތްކުރާ ފަތުރުވެރިންގެ އަދަދު އެއް މިލިޔަނަށް އަރައެވެ.