ކޮންމެ އަހަރެއްގެވެސް އޭޕްރިލް މަހުގެ 2 ވަނަ ދުވަހަކީ ބައިނަލްއަޤުވާމީ ފެންވަރުގައި އޯޓިޒަމަށް ހޭލުންތެރިކުރުމުގެ ގޮތުން ފާހަނގަކުރެވޭ ދުވަހެކެވެ. މިގޮތުން މިއަހަރުގެ ޝިޢާރަކީ "އެސިސްޓިވް ޓެކްނޮލޮޖީ، އެކްޓިވް ޕާޓިސިޕޭޝަން"އެވެ. މިދުވަހަކީ ރަސްމީކޮށް އޯޓިޒަމަށް ހޭލުންތެރިކުރުމުގެ ގޮތުން ފާހަނގަކުރެވޭ ދުވަސްކަމުގައިވިޔަސް، ޙަޤީޤަތަކީ އަހަރުގެ ކޮންމެ ދުވަހަކުވެސް ކަމާ ބެހޭ ފަރާތްތަކުން އޯޓިޒަމަށް މީހުން ހޭލުންތެރިކުރުމުގައި މަަސައްކަތްކުރަމުންދާކަމެވެ.
އޯޓިޒަމްއަކީ ކޮބާ؟
އޯޓިޒަމް، ނުވަތަ އޯޓިޒަމް ސްޕެކްޓްރަމް ޑިސްއޯޑަރއަކީ ކުއްޖާގެ ސިކުނޑި ތަރައްގީވެ، ހެދިބޮޑުވުން ތަފާތުވުމުގެ ސަބަބުން ކުއްޖާގެ މުވާސަލާތްކުރުން، މުއާމަލާތްކުރުން އަދި އިޖްތިމާއީ ގުޅުން އުފެއްދުމުގެ ހުނަރު ތަރައްޤީކުރުމަށް ދިމާވާ ދަތިކަމެކެވެ. ބައެއް ޙާލަތްތަކުގައި ކުއްޖާގެ އުގެނުމާއި، ކަންކަމަށް ސަމާލުކަން ދިނުން އަދި ހިއްސުތައް މަސައްކަތް ކުރާ ގޮތުގައި ވެސްކުދިންގެ ތަފާތުތަކެއް ހުރެއެވެ. ނަމަވެސް މިއީ ނުކުޅެދުންތެރިކަމެއް ނޫނެވެ. އަދި އުނިކަމެއްވެސް ނޫނެވެ. ކޮންމެ މީހަކީވެސް ތަފާތު ގޮތަކަށް އުފެދި، ތަފާތު ހުނަރުތަކެއް ހުންނަ މީހެއް ފަދައިން، އޯޓިޒަމް ހުންނަ ކުދިންނަކީވެސް ތަފާތުގޮތަކަށް ކުޅެދޭ ކުދިންނެވެ.
އޯޓިޒަމަށް ހޭލުންތެރި ކުރުމުގެ ރިބަން
އޯޓިޒަމަށް ހޭލުންތެރިކުރުމުގެ ރަމްޒެއްގެ ގޮތުގައި 1999 ވަނަ އަހަރު ބޭނުންކުރަން ފެށި ރިބަނަކީ ކޮންމެ އަހަރެއްގެ އޭޕްރިލް މަހުގެ ތެރޭގައި ވަރަށް ޢާންމުވެ، ގިނަ ބަޔަކު ބޭނުންކުރާ ރިބަނެކެވެ. އެހެންނަމަވެސް ގިނަ ބަޔަކަށް ރިބަނުގެ ތަފާތު ކުލަތަކާއި ޑިޒައިނުން ބުނެދެނީ ކޮންކަމެއްކަން ގިނަފަހަރަށް އޮންނަނީ ނޭނގިފައެވެ.
ރިބަނުގެ ޑިޒައިން
އޯޓިޒަމަށް ހޭލުންތެރިކުރުމުގެ ގޮތުން ބޭނުންކުރެވޭ ރިބަނުގެ ޑިޒައިނުގައި ހުންނަނީ ގުޅުވާލެވިފައިވާ ތަފާތު ބަށްޓަންތަކަށް ހުންނަ ޕަޒްލް ގެ އެތިކޮޅުތަކެވެ. މިކަމުން ދޭހަކޮށްދެނީ އޯޓިޒަގެ ފުޅާކަމާއި، ތަފާތުކަމެވެ. އޯޓިޒަމްގެ ސިފަތަކަކީ އެކިމީހުންގެ ކިބައިން އެކި ގޮތްގޮތަށް ފެންނަ ސިފަތަކެކެވެ. އަދި އޭގެ އަސަރު އެކި ކުދިންނަށް ކުރަނީ އެކި ވަރަށެވެ. އޯޓިޒަމްގެ ކޮމްޕްލެކްސްކަމުން، އޯޓިޒަމް ކުރިމަތިވާން ދިމާވާ ސަބަބާއި، އެއަށް ދާއިމީ ފަރުވާއެއް ހޯދިފައިނުވިނަމަވެސް، ޓެކްނޮލޮޖީއާއި ސިއްޙީ ދާއިރާއަށް ލިބިފައިވާ ކުރިއެރުންތަކުން އެކުދިންނަށް ބޭނުންވާ ޚާއްސަ އެހީތެރިކަމާއި ތެރަޕީތަކުގެ ބޭނުންކޮށްގެން، މުޖުތަމަޢުގެ ކަންކަމުގައި އުނދަގުލެއްނެތި ބައިވެރިވެއުޅެވެއެވެ.
ރިބަނުގެ ކުލަތަކާއި ބަށްޓަންތައް ތަފާތުވުން
ރިބަނުގައި ބޭނުންކުރެވިފައިވާ ކުލަތަކާއި ބަށްޓަންތަކަކީވެސް ތަފާތު ކުލަތަކާއި ބަށްޓަންތަކެވެ. މިކަމުން އަންގައިދެނީ އޯޓިޒަމް ސްޕެކްޓްރަމްގައި ހިމެނޭ މީހުންނާއި އާއިލާތަށް މުޅި ދުނިޔޭގެ ހުރިހާ ހިސާބަކަށް ފެތުރިފައިވާކަމެވެ. އަދި އޯޓިޒަމްއަކީ ވަކި ޤައުމަކަށް، ނަސްލަކަށް ނުވަތަ ސަރަހައްދަކަށް ޚާއްސަ ކަމެއް ނޫންކަމެވެ. އަދި ހަމައެހެންމެ، އޯޓިޒަމް ހުންނަ މީހުންގެ ހުނަރުތަކާއި، އެމީހުން ޤާބިލިއްޔަތުތަކަކީ ވަރަށް ފުޅާދާއިރާއަކަށް ބެހިގެންވާ ކަންކަންކަމެވެ.
ރިބަނުގެ ގަދަ ކުލަތައް
މި ރިބަނުގައި މައިގަނޑުގޮތެއްގައި ބޭނުންކުރެވިފައި ހުންނަނީ ރީނދޫ، ރަތް، ގަދަ އަދި މަޑު ނޫކުލައެވެ. މިކަމުގެ ސަބަބުން ރިބަން ދައްކުވައިދެނީ ވަރަށް ކުލަގަދަކޮށެވެ. މިކަމުގެ ފަހަތުގައިވާ ހިކުމަތަކީ އުންމީދެވެ. އަދި ކުރިމަގުގެ އުޖާލާކަމެވެ. އޯޓިޒަމްއާއި ބެހޭގޮތުން ހޭލުންތެރިކަން އިތުރުކުރުމާއި، ކުޑައިރު ފަރުވާ ދިނުމާއި، ބޭނުންވާ ޚިދުމަތްތަކާއި އެހީތެރިކަން ލިބުމުގެ ސަބަބުން އޯޓިޒަމް ހުންނަ ފަރާތްތަކަށް މުޖުތަމަޢުގައި އެމީހުންގެ އަމިއްލަ ގޮތުގައި އުޅެވުމުގެ އުންމީދުގެ ކުލަގަދަކަމެވެ.
މިރިބަނަކީ ދުނިޔޭގައިވެސް އެންމެ ފާހަގަކޮށްލެވޭ، އެންމެ ގިނައިން ބޭނުންކުރެވޭ އެއް ރިބަނެވެ. އަދި މި ރިބަނުން ދޭހަވާ ކަންކަން އެކި މީހުން ސިފަކުރަނީވެސް އެކި ގޮތްގޮތަށެވެ.