ރައްޔިތުންނަށް "ހަމަ ނޭވާލެވޭނީ" ވައްކަން ކުރި މީހުން ޖަލަށް ލައިގެންކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ތުޅާދޫ ދާއިރާއަށް ވާދަ ކުރައްވާ ހިސާން ހުސައިންގެ ކެމްޕެއިން ޖަލްސާގައި ވާހަކަފުޅު ދައްކަވަމުން ރައީސް އިބްރާހިމް މުހައްމަދު ސޯލިހު ވިދާޅުވީ މަޖިލީހުގެ އައުލަބިއްޔަތު އެމްޑީޕީއަށް ލިބިއްޖެނަމަ ކޮރަޕްޝަންގެ ބޮޑެތި މައްސަލަތައް ބަލައި، ވަކި ފަރާތަކަށް ބުރަ ނުވެ، އިންސާފު ގާއިމްކޮށްދޭނެ ޝަރުއީ ނިޒާމެއް ހޯދާނެކަމަށެވެ.
ރައީސް ސޯލިހު ރޭ ވަނީ ކުރތީގެ ސަރުކާރުން ހިންގާފައިވާ ބޮޑެތި ކަރަޕްޝަންގެ މައްސަލަތަކުގެ ތަފްސީލު ހިއްސާ ކުރައްވާފައެވެ. އެގޮތުން ދަރުމަވަންތަ ހޮސްޕިޓަލާއި ހިޔާ މަޝްރޫއުގެ ކަރަޕްޝަންގެ މައުލޫމާތުވަނީ ހިއްސާ ކުރައްވާފައެވެ.
ރައީސް ވިދާޅުވީ 54 މިލިއަން ޑޮލަރަށް އެޅެން އޮތް ދަރުމަވަންތަ ހޮސްޕިޓަލް އެޅުމަށް 220 މިލިއަން ޑޮލަރު ހަރަދުކޮށްފައިވާ އިރު އެއީ ދިވެހިންނަށް ދާއިމަށް ފެންނަން ހުންނާނެ ވައްކަމާއި ކަރަޕްޝަންގެ އިމާރާތެއް ކަމަށެވެ.
"އަޅުގަނޑުމެންނަށް ތަންކޮޅެއް ދުރުން ފެންނާނެ އުސް އިމާރާތެއް. ވައްކަމާއި ކޮރަޕްޝަން ދާއިމަށް ފެންނަ ގޮތަށް އިމާރާތް ކުރެވިފައިވާ އިމާރާތެއް. ތިބޭފުޅުންނަށް އެނގިވަޑައިގަންނަވާނެ އެ އިމާރާތް ކުރުމަށް ބަޖެޓް ކުރެވިގެން އޭރު ގޮސްފައި އޮތް ވަރު. 54 މިލިއަން ޑޮލަރަށް އެޅޭ އިމާރާތެއް، 144 މިލިއަން ޑޮލަރު ހޭދަކޮށްގެން އަޅާފަ ހުރީ. އެ ހިސާބުން އެކަން ނިމުނީއަކީ ނޫނޭ. އަދި އެތަނަށް ބޭނުންވާ ފަރުނީޗަރާއި އިކުއުޕްމެންޓް ގަތުމަށްޓަކާ އިތުރު 80 މިލިއަން ޑޮލަރު ނަގައިފި. މުޅިއެކު 220 މިލިއަން އެތަނަށް ހަރަދުވޭ،"
ރައީސް ވިދާޅުވީ ދަރުމަވަންތަ ހޮސްޕިޓަލްގެ އިމާރާތުގެ ތެރެއަށް މެޝިނެއް ވައްދައިފިނަމަ ދޮރު ނުލެއްޕޭ ކަމަށެވެ. އަދި މެޝީންގެ ގޮތުގައި ތަނަށް ގެނެސްފައިވަނީ ކުރީގެ މެޝިނަރީތަކެއް ކަމަށެވެ.
މީގެ އިތުރުން ރައީސް ޔާމީންގެ ސަރުކާރުން އަޅަން ފެށި ހިޔާ ފްލެޓުތަކުގެ ހާލަކީ އޭގެ ފްލެޓެއްގެ ތެރެއަށް ކަބަޑެއް ވައްދައިފިނަމަ ދޮރު ނުލެއްްޕޭ ކަމަށެވެ. ރައީސް ވިދާޅުވީ މިއިން ފެނިގެން ގޮސްފައިވަނީ ވައްކަމާއި ކަރަޕްޝަން ކަމަށެވެ.