ކުރިއަށް އޮތް ރައްޔިތުންގެ މަޖިލިސް އިންތިޚާބުގައި ބައެއް ދާއިރާތަކަށް އަމިއްލަ ގޮތުން ވާދަކުރާ މިނިވަން ކެންޑިޑޭޓުންގެ ގްރޫޕަކާ ކޮމަންވެލްތުން ރާއްޖެއަށް މިހާރު އައިސްފައިވާ ވަފުދެއް ބައްދަލުކޮށްފިއެވެ.
މިބައްދަލުވުމަކީ ރާއްޖެއިން ކޮމަންވެލްތާއި އަލުން ގުޅުމަށް ތައްޔާރުވަމުން އަންނާތީ، ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހްގެ އެދިލެއްވުމުގެ މަތިން ބޭއްވި ބައްދަލުވުމެއް ކަމަށް އެ ޖަމިއްޔާއިން ބުނެއެވެ. ކުރީގެ ރައީސް ޔާމީންގެ ވެރިކަމުގައި ކޮމަންވެލްތުން ރާއްޖެ ވަކިވި ނަމަވެސް އާ ސަރުކާރުން ވަނީ ކޮމަންވެލްތުގައި އަލުން ބައިވެރިވުމަށް ނިންމާފައެވެ.
މަޖިލިސް އިންތިޚާބު އޮބްޒާވު ކުރަން ކޮމަންވެލްތުން ވަފުދެއް ފޮނުވާފައިވާއިރު އެ ވަފުދުގައި އިސްކޮށް ހަރަކާތްތެރިވަނީ ޖެމެއިކާގެ ކުރީގެ ބޮޑުވަޒީރު ބްރޫސް ގޯލްޑިން އެވެ.
މިނިވަން ކެންޑިޑޭޓުންނާ ކޮމަންވެލްތުން ބައްދަލުކޮށް، ކެންޑިޑޭޓުންނަށް ކެމްޕޭނު ކުރުމުގައި ހަމަހަމަ ފުރުސަތުތަކެއް ލިބިފައި އޮތްތޯ ބަލައި، ކުރިމަތިވެފައިވާ ގޮންޖެހުންތައް އޮޅުން ފިލުވިއެވެ.
އިންތިޚާބު އޮބްޒާވްކޮށް އިންތިޚާބާ ގުޅޭ ރިޕޯޓުން ރާއްޖެ އަލުން ކޮމަންވެލްތާ ބައިވެރިކުރުމާ ގުޅޭގޮތުން މައުލޫމާތު ލިބޭނެ ކަމަށް ކޮމަންވެލްތުން ބުނެފައިވެއެވެ.
މިފަހަރުގެ އިންތިޚާބު އޮބްޒާވު ކުރަން ބޭރުގެ 30 ފަރާތެއް ހަރަކާތްތެރިވާނެއެވެ. ފާއިތުވެދިޔަ އިންތިޚާބުތައް ގޮސްފައިވަނީ ޖުމުލަކޮށް ހަމަނުޖެހުން މަދު، އަދި މައްސަލަތައް ވެސް މަދު އިންތިޚާބުތަކުގެ ގޮތުގައި ކަން ފާހަގަކޮށްލެވެއެވެ.