ހިނގަމުން މިދާ ރައީސް އިބްރާހިމް މުހައްމަދު ސޯލިހްގެ ވެރިކަމުގެ ފަސް އަހަރު ނިމޭ އިރު މި ދިވެހި ރާއްޖޭގައި މީހުން ދިރިއުޅޭ ހުރިހާ ރަށަކަށް، ސާފު ބޯ ފެނާއި ނަރުދަމާގެ ނިޒާމް ގާއިމް ކުރެވިގެންދާނެ ކަމަށް ރައީސް ވިދާޅުވެއްޖެއެވެ.
ރައީސް މިހެން ވިދާޅުވެފައިވަނީ މިއަދު ހުޅުމާލޭގެ ދެވަނަ ފިޔަވަހީގެ ފެނާއި ނަރުދަމާ ގާއިމް ކުރެއްވުމުގެ ހަފްލާގައި ވާހަކަ ދައްކަވަމުންނެވެ. އެމަނިކުފާނު ވިދާޅުވީ، ރާއްޖޭގެ 99 އިންސައްތައަކީ ކަނޑަށް ވެފައިވި ނަމަވެސް ދިވެހިންނަށް ސާފު ބޯފެން ލިބުމުގައި ނުހަނު ދަތިތަކާ ކުރިމަތިލާން ޖެހޭ ކަމަށެވެ.
ބޯފެން ހޯދުމަށް ރައްޔިތުން ބިމުގެ އަޑިން ފެން ނަގަން ޖެހުމުގެ ސަބަބުން ރަށްތަކުގެ ފެން ފަށަލަ ވަރަށް ބޮޑަށް ތުނި ވެފައިވާ ކަމަށާއި، އަދި ނަރުދަމާގެ ނިޒާމެއް ނެތުމުން ނަޖިސް ފެން، ފެން ފަށަލާ ތަޣައްޔަރުވެ ސާފު ފެން ލިބުމުގައި އިންތިހާއަށް ދަތިވެފައިވާކަން ރައީސް ފާހަގަކުރެއްވިއެވެ. އަދި ހަމައެއާއެކު މޫސުމަށް އަންނަ ބަދަލުތަކުގެ ސަބަބުން ވެސް އެ ފެން ފަށަލައަށް އިތުރު ނާޒުކު ކަމެއް ލިބިފައިވާ ކަމަށް ރައީސް ވިދާޅުވިއެވެ.
އެހެންކަމުން، ކަނޑުގެ ލޮނު ސާފު ބޯފެނަށް ބަދަލުކޮށް ޑީސެލިނޭޝަން މެދުވެރިކޮށް ސާފު ބޯފެން ހޯދުމުގެ މުހިންމު ކަމަށް ރައީސް ވަނީ އަލިއަޅުވާލާފައެވެ. އަދި މި ފުރުސަތުގައި ރައީސް ވަނީ ތިމާވެއްޓަށް ގެއްލުން ލިބޭ ފަދަ ޑީސަލް އިންޖީނުތައް ބޭނުން ކުރުމުގެ ބަދަލުގައި ތިމާވެއްޓާ ރަށްޓެހި ނިޒާމްތައް ބޭނުންކުރުމަށް ވެސް ރައީސް ވަނީ ގޮވާލާފައެވެ.
މީގެ އިތުރުން، ރާއްޖޭގެ ފެން ކުންފުނިން ލިބޭ ފެން، 7 ލާރިއަށް ލީޓަރެއްގެ ގޮތުގައި ލިބޭއިރު ދިވެހިން އެއްގޮތަކަށް ވެސް އަގުބޮޑުކޮށް ފެން ގަނެގެން ބުއިމުގެ ބޭނުމެއް ނެތް ކަމަށާއި އެ ޚަރަދުވެސް ރައްކާ ކުރުމުގެ ފުރުސަތު އޮތް ކަމަށް ރައީސް ވަނީ ވިދާޅުވެފައެވެ.