ކުރީގެ ހޯމް މިނިސްޓަރ އަޒްލީން އަހުމަދަކީ އިޚުލާސްތެރިއެއް ނޫން ކަމަށް ވިދާޅުވެ ކުރީގެ ރައީސް އަބްދުﷲ ޔާމީން އޭނާއަށް ފާޑުވިދާޅުވެއްޖެއެވެ.
ޔާމީންގެ ފާޑުވިދާޅުވުންތައް އަޒްލީނަށް އަމާޒުވެފައިވަނީ ޕީއެންސީގެ ވަގުތީ ލީޑަރ، އަބްދުއްރަހީމް އަބްދުﷲ ގެ ދަރިފުޅު، އިބްރާހިމް ފައިސަލްއާ އެއް ދާއިރާއަކަށް އަޒްލީން ވާދަކުރައްވާތީއެވެ. ޔާމީން ވަނީ އިދިކޮޅު ކޯލިޝަނުގެ ކެންޑިޑޭޓަކީ ފައިސަލް ކަމަށާއި އަދި އެމަނިކުފާނުގެ ތާއީދު އޮތް ބޭފުޅަކީވެސް ފައިސަލް ކަމަށް ރޭ އޭނާގެ ކެމްޕޭނު ހަރަކާތެއްގައި ފޯނުން ދެއްވި މެސެޖެއްގައެވެ.
ޔާމީން ވަނީ އަޒްލީން ދާއިރާ ރައްޔިތުން ކައިރީގައި އޭނާއަކީ އެމަނިކުފާނުގެ ތާއީދާއެކު ނިކުންނަ ކެންޑިޑޭޓު ކަމަށް ވިދާޅުވާ ކަމަށް ތުހުމަތުކުރައްވައި، އެވާހަކަތައް ދޮގު ކުރައްވާފައެވެ. އަދި ފައިސަލަކީ ޕީޕީއެމާއި ދިވެހި ގައުމަށް ވެސް އަގުހުރި އިޚުލާސްތެރި މަސައްކަތެއް ކޮށްދެއްވާފައިވާ ބޭފުޅެއް ކަމަށް ވިދާޅުވެ އެމަނިކުފާނުގެ ސަޕޯޓަރުންގެ ކިބައިން އޭނާއަށް ވޯޓު ދެއްވުމަށް ގޮވާލާފައެވެ.
ޔާމީންގެ އިތުރުން ވެސް އިދިކޮޅު ކޯލިޝަންގެ ބައެއް ބޭފުޅުން ވަނީ އަޒްލީނަކީ ފައިސާގެ އަވާގައި ޖެހި، ޕާޓީއަށް ގެއްލުން ދޭން ނިކުމެ ހުރި މީހެއް ކަމަށް ބުނެ ފާޑުވިދާޅުވެފައެވެ.