ސްޕެނިޝް ލީގުގައި މާދަމާ ރޭ އެންމެފަހުގެ ޗެމްޕިއަން ބާސެލޯނާއާ ދެކޮޅަށް ކޭމްޕް ނޯގައި އެތުލެޓިކޯ މެޑްރިޑް ކުޅުމަށް ހަމަޖެހިފައިވާ މެޗު ކާމިޔާބުކޮށްފިނަމަ ލީގު ހޯދުމުގެ ފުރުޞަތު އެބައޮތްކަމަށް އެ ޓީމުގެ ކޯޗު ޑިއޭގޯ ސިމިއޯނީ ބުނެފިއެވެ.
މިދިޔަ އަންގާރަ ދުވަހުގެ ރޭ އަމިއްލަ ދަނޑުގައި ޖިރޯނާ އަތުން 2-0 އިން އެތުލެޓިކޯ މޮޅުވިއިރު ވިޔާރެއާލްއާ ދެކޮޅަށް ބާސެލޯނާ ކުޅުނު މެޗުން 4-4 އިން އެއްވަރުވުމުން އެ ދެ ޓީމުގެ ދެމެދު އޮތް ފަރަގު ވަނީ 8 ޕޮއިންޓަށް ކުޑަވެފައެވެ.
"އަހަރެމެންނަށް ލީގު ލިބެން އޮތް ހަމައެކަނި ގޮތަކީ ބާސެލޯނާ ބަލިކުރުން." ބާސެލޯނާއާ ދެކޮޅަށް ކުޅުމަށް ހަމަޖެހިފައިވާ މެޗުގެ ކުރީން ބޭއްވި ޕްރެސް ކޮންފަރެންސްގައި ވާހަކަދައްކަމުން ސިމިއޯނީ ބުންޏެވެ.
"މާދަމާ ރޭ ގެ މެޗަށް ނިކުންނައިރު ބާސެލޯނާއާ ދެމެދު 8 ޕޮއިންޓުގެ ފަރަގެއް އޮތުމުން އެ މެޗުން ރަނގަޅު ނަތީޖާއެއް ހޯދުން މުހިއްމު."
"މީގެއިތުރުން، އެތުލެޓިކޯ އަކީ ބާސެލޯނާއާ އެންމެ ވާދަވެރި ކްލަބުކަމަށް އެމީހުން ދެކޭކަމީ މި ޓީމުގެ ހުރިހާ ކުޅުންތެރިން ކުރާ ބުރާ މަސައްކަތް ދައްކުވައިދޭ އެއް ހެކި."
ބާސެލޯނާއާ ދެކޮޅަށް އެތުލެޓިކޯ ނިކުންނައިރު އެ ޓީމުގެ ފޯވާޑްލައިންގައި ހިމެނޭ ޑިއޭގޯ ކޮސްޓާ އާއި ތޯމަސް ލެމާ އަދި އަލްވާރޯ މޮރާޓާ އަށް ލިބިފައިވާ އަނިޔާއިން ރަނގަޅުވެ އެ މެޗަށް ފިޓްވާނެކަމާއި މެދު ވަނީ ސުވާލު އުފެދިފައެވެ.
ސިމިއޯނީ ވަނީ ކޮސްޓާ އާއި މޮރާޓާ އެ މެޗަށް ފިޓްވެފައިވާކަމަށް ބުނެފައެވެ. އެހެންނަމަވެސް، ބާސެލޯނާއާ ދެކޮޅަށް ނެރޭނީ ކޮން ފޯވާޑުންނެއްކަމެއް އަދި ކަށަވަރުނުވާކަމަށާއި ތިން ފޯވާޑުން ކުޅެން ނެރުމަކީ ދުރުގައިވާކަމެއްނޫންކަމަށް އޭނާ ބުންޏެވެ.
މީގެއިތުރުން، ސިމިއޯނީ ވަނީ އެ ޓީމުގެ ގޯލްކީޕަރު ޔާން އޯބްލަކް އަށް ތައުރީފުކޮށް ވާހަކަދައްކާފައެވެ. އެގޮތުން، އޭނާ ބުނީ ވަރުގަދަ ކޮންމެ ޓީމެއްގައިވެސް މޮޅު ކީޕަރެއް ހުންނާނެކަމަށާއި އެގޮތުން އޯބްލަކް އަކީ ވަރަށް މޮޅު ގޯލްކީޕަރެއްކަމަށެވެ.
ބާސެލޯނާއާ ދެކޮޅަށް އެތުލެޓިކޯ ކުޅުމަށް ހަމަޖެހިފައިވާ މެޗު ފަށާނީ ރާއްޖޭގަޑިން މާދަމާ ރޭ 11:45 ގައެވެ.