ގއ. ވިލިނގިލީ ވޯޓު ފޮށްޓަކަށް ވޯޓު އެޅުމުގެ ކުރިން ކަރުދާސްކޮޅު ފޮޓޯ ނެގި ކަމުގެ ތުހުމަތުގައި ފުލުހުން މީހަކު ހައްޔަރުކޮށްފިއެވެ.
ފުލުހުން މައުލޫމާތު ދޭ ގޮތުގައި ހައްޔަރުކޮށްފައިވަނީ އުމުރުން 36 އަހަރުގެ ފިރިހެނެކެވެ. މުޅި ރާއްޖޭގައި މިއަދު ހެނދުނު 8:00 އިން ފެށިގެން ވޯޓުލުން ފެށިގެން ކުރިއަށްދާއިރު މިހާތަނަށް ބޮޑު މައްސަލައެއް ފެންމަތިވެފައެއް ނުވެއެވެ.
ފުލުހުން ބުނީ ވޯޓާ ގުޅޭ ދެ މައްސަލައެއް ހުށައެޅުމުން ބަލަމުން އަންނަ ކަމަށެވެ. މިހާތަނަށް މުޅި ރާއްޖޭގައި 94،000 އަށް ވުރެ ގިނަ މީހުން ވަނީ ވޯޓު ލާފައެވެ.
މިއަދު ހަވީރު 4:00 ވަންދެން ވޯޓުލުން ކުރިއަށް ދާނެއެވެ. ފުލުހުން ވަނީ މި އިންތިޚާބަށް ވަރަށް ބޮޑަށް ތައްޔާރުވެފައި ކަމަށް ސީޕީ ހަމީދު ވަނީ ވިދާޅުވެފައެވެ.